„Þegar við komum til Ís­lands munum við stöðva hann“

Í myndbandinu sem birt var í gær sést hvar Paul Watson fer um borð í skipið Bandero og heilsar upp á áhafnarmeðlimi. Í færslu á Facebooksíðu samtakanna Captain Paul Watson Foundation segir að Bandero sé á leið til Íslands til að takast á við hvalveiðar Kristjáns Loftssonar.

„Þegar við komum til Íslands munum við stöðva hann,“ segir í færslunni og jafnframt að sex hvalir hafi verið veiddir það sem af er hvalveiðitímabilinu.

Í myndbandinu sést Watson ræða við fólk um borð í Bandero þar sem hann segir að um sé að ræða stórkostlega ferð.

„Við þurfum að gera allt sem við getum til að sjá til þess að þeir drepi enga hvali á meðan við erum þarna,“ segir Watson jafnframt.

Gæslan átt samskipti við ríkislögreglustjóra vegna málsins

Ekki er ljóst hvenær Bandero kemur í íslenska lögsögu og í myndbandinu er ekki tekið fram hvaðan það siglir.

Í samtali við fréttastofu segir Ásgeir Erlendsson samskiptastjóri Landhelgisgæslunnar að gæslan hafi verið í samskiptum við embætti ríkislögreglustjóra vegna málsins og hafi fylgst með því sem greint hefur verið frá á samfélagsmiðlum. 

Gæslan muni bregðast við ef tilefni gefst og sérstaklega ef lífi og heilsu fólks sé ógnað.

Í síðasta mánuði boðaði stofnun Paul Watson til aðgerðar 86 í sumar til að binda enda á hvalveiðar Íslendinga. Aðgerð 86 vísar til þess atburðar þegar aðgerðasinnar sökktu skipunum Hval 6 og Hval 7 í Reykjavíkurhöfn árið 1986.