Skilja vin­áttuna eftir utan vallar

Þjóðverjinn Zverev og Ítalinn Cobolli urðu miklir mátar þegar þeir kepptu saman fyrir lið Evrópu gegn Bandaríkjunum í Laver bikarnum árið 2024.

Zverev talaði fallega um Cobolli eftir undanúrslitin. Hann sagði vináttu þeirra að sjálfsögðu byggja mikið á tennis en talaði einnig um sameiginlegan áhuga þeirra á bíómyndum.

Feður þeirra, sem eru einnig þjálfarar þeirra, eru einnig mjög góðir vinir.

„Hann er frábær tennisspilari og frábær náungi. Mér líkar vel við hann og föður hans líka, þeir eru góðir menn. Þetta verður fyrsti úrslitaleikurinn hans og ég samgleðst honum að hafa náð svona langt,“ sagði Zverev en hann ætlar ekki að hleypa vini sínum neitt lengra.

„Þegar þú spilar úrslitaleik á risamóti er ekki erfitt að leggja vináttuna til hliðar. Við erum komnir á stærsta sviðið, við munum reyna að eyðileggja hvor fyrir öðrum og það er allt í góðu.“

Þetta verður í þriðja sinn sem þeir mætast en Zverev og Cobolli hafa unnið sitt hvora viðureignina.

Zverev þykir sigurstranglegri, enda efsti maður heimslistans á mótinu eftir að Jannik Sinner og Novak Djokovic duttu út. Ríkjandi meistarinn Carlos Alcaraz gat ekki tekið þátt vegna meiðsla.

Þjóðverjinn er hins vegar illa brenndur af úrslitaleikjum síðustu ára. Hann missti niður tveggja setta forystu í úrslitaleik Opna bandaríska árið 2020 og lenti aftur í því að missa niður forystu í úrslitaleik Opna franska árið 2024.

Úrslitaleikur Opna franska meistaramótsins hefst klukkan 13:00 í beinni útsendingu á Eurosport stöðinni sem fylgir með sportáskrift að Sýn .