Flóki með á fyrsta Grand Prix-móti ársins

Eftir frábært gengi undanfarið hefur Flóki tryggt sér keppnisrétt í -80 flokki á Grand Prix í bardaga sem haldið er í Róm í júní.

Þetta eru líka stór tímamót fyrir Taekwondo á Íslandi. Flóki er fyrsti Íslendingurinn sem vinnur sér inn sæti á Grand Prix fyrir Ísland og annar Íslendingurinn til að keppa á Grand Prix frá upphafi.

Grand Prix er sterkasta mótaröð í heimi og það eru einungis topp 32 keppendurnir í hverjum ólympískum flokki sem vinna sér inn þátttökurétt.

„Við erum einstaklega stolt af þeim árangri sem landslið Íslands í bardaga hefur náð á undanförnum árum, fyrst undir stjórn Gunnars Bratli og svo síðasta árið undir stjórn Richard Fairhurst. Við óskum Guðmundi Flóka og Rich til hamingju með stórkostlegan árangur og hlökkum til með að styðja við og fylgjast með landsliðinu okkar sem stefnir ótrautt áfram að þátttöku á Ólympíuleikunum 2028,“ segir í frétt á miðlum Taekwondosambands Íslands.