Ó­trú­legur O'Sullivan enn að slá met

O'Sullivan er meðal keppenda á World Open í Yushan þar sem hann rúllaði Ryan Day upp 5-0 í átta manna úrslitum. Þar lokaði O'Sullivan einu settinu með 153 stigum í röð.

Hann setti grænu kúluna niður fyrst og í kjölfarið sextándu rauðu kúluna og því næst sína fyrstu svörtu. Eftir það fylgdu næstu 15 rauðar sem eftir voru, 13 svartar og tvær bleikar áður en hann hreinsaði borðið, það er að segja allar sex litakúlurnar á borðinu, til að ná 153 stigum í röð.

Þar með slær O'Sullivan met en 153 er stærsta stigaröð í heimssögu snókersins. Fyrra met átti Jamie Burnett er hann raðaði inn 148 til að loka ramma á Breska meistaramótinu árið 2004, fyrir 22 árum síðan.

O'Sullivan er 50 ára gamall en sýnir enn á ný að lengi lifir í gömlum glæðum. Met næturinnar bætist á langan metalista Bretans sem hefur unnið flesta Triple Crown titla í sögunni (8), flest Bresk meistaramót (8), er jafn Stephen Hendry með flesta heimsmeistaratitla (7) auk þess sem hann er elsti heimsmeistari sögunnar (46 ára, árið 2022).

Með sigri næturinnar kemst O'Sullivan í undanúrslit mótsins í Yuhan þar sem hann mætir heimamanninum Wu Yize.