Upp­gjörið: Grinda­vík - ÍR 100-95 | Grind­víkingar með níu fingur á deildarmeistaratitlinum

Grindvíkingar tóku á móti ÍR-ingum í kvöld í ansi fjörugum og hröðum leik. Heimamenn mættu til leiks án Daniel Mortensen sem snéri sig á ökkla í síðasta leik og var Valur Orri því mættur í byrjunarliðið og þá snéri Ólafur Ólafsson aftur í liðið eftir meiðsli.

Gestirnir fóru ágætlega af stað og leiddu í upphafi leiksins en Grindvíkingar voru fljótir að snúa leiknum við og voru tíu stigum yfir eftir fyrsta leikhluta, 30-20.

Í öðrum leikhluta var boðið upp á mikið þristaregn frá báðum liðum en alls voru komnir 15 þristar á tölfræðiblaðið í hálfleik. ÍR tók gott áhlaup undir lok hálfleiksins og náði að minnka muninn í tvö stig, 44-42 þar sem Grindvíkingar voru að spila illa á báðum endum vallarins.

Þeir rönkuðu þó við sér í kjölfarið og leiddu með ellefu stigum í hálfleik, 61-50.

Grindvíkingar voru mun betri framan af þriðja leikhluta en þristar frá Kavas héldu ÍR-ingum á lífi. Heimamenn náðu þó að ýta muninn upp í þrettán stig og þá tók Borche gott leikhlé og ÍR kláraði leikhlutann á góðu áhlaupi. Staðan 82-75 fyrir lokaátökin og leikurinn galopinn.

ÍR-ingar hófu leikhlutann með látum og tveir þristar frá Hákoni í röð þýddu að munurinn var allt í einu kominn niður í eitt stig og nóg eftir af körfubolta. Í kjölfarið lauk hvíld Jeremy Pargo og Jordan Semple á bekk Grindavíkur, sennilega töluvert á undan áætlun.

Eftir þetta hægðist mjög á stigaskorinu en hvorugu liðinu tókst að skora í rúmar tvær mínútur í kjölfarið. Það hentar Grindvíkingum sennilega betur að hægja aðeins á leiknum og náðu þeir að ýta muninum aftur upp í níu stig þegar rúmar fjórar mínútur voru eftir af leiknum.

Reynslan reyndist Grindvíkingum dýrmæt í brakinu þar sem þeir héldu haus og mjötluðu þennan sigur með seiglunni. Lokatölur í Grindavík 100-95.

Atvik leiksins

Það varð áhugavert atvik í fjórða leikhluta þar sem Grindvíkingar voru að bruna í sókn en einn leikmaður ÍR lá meiddur hinumegin á vellinum. Dómarar leiksins ákváðu að stöðva leikinn þrátt fyrir að ekki væri um höfuðmeiðsl að ræða og voru Grindvíkingar vægast sagt ósáttir.

Sem betur fer fyrir dómara leiksins hafði þetta atvik þó ekki úrslitaáhrif á úrslitin.

Stjörnur og skúrkar

DeAndre Kane mætti afar einbeittur og ákveðinn til leiks en hann lét auðvitað reka sig út úr húsi síðast þegar liðin mættust. Í viðtali eftir leik sagði hann þó að hann hefði ekki haft þá frammistöðu bakvið eyrað að þessu sinni.

Kane skoraði 28 stig í kvöld og var afar skilvirkur í öllum sínum sóknaraðgerðum. Þá var Jeremy Pargo einnig mjög öflugur með 21 stig og níu stoðsendingar og Jordan Semple skoraði sömuleiðis 21 stig og tók tíu fráköst.

Hjá ÍR endaði Hákon Örn stigahæstur með 24 stig, og munaði mestu um þristana fimm sem hann setti. Falko var nálægt þrefaldri tvennu, 21 stig, átta fráköst og átta stoðsendingar.

Þá átti Matej Kavas mjög fínan leik, endaði með 23 stig, átta fráköst og fimm stoðsendingar.

Dómararnir

Það var spilað fast í kvöld en tiltölulega lítið flautað og það er alltaf best svo lengi sem það fer ekki í taugarnar á leikmönnum. Ágætlega dæmdur leikur en það voru í það minnsta tvö mjög skrítin atvik. 

Annars vegar það sem er nefnt hér að ofan og svo þegar Kane fiskaði villu í stöðunni 96-90. Dómarinn næst boltanum dæmdi en Simmi ætlaði augljóslega að dæma sóknarvillu. Það væri áhugavert að sjá endursýningu á þessu atviki.

Stemming og umgjörð

Virkilega góð mæting Grindavíkurmegin í kvöld og góð stemming í stúkunni. Það mættu aftur á móti bara um það bil 25 ÍR-ingar. Hvar eru Ghetto Hooligans eiginlega á þessum síðustu og verstu tímum?

Viðtöl

Kane: „Ég hætti að hugsa um þann leik fyrir löngu“

DeAndre Kane var frábær í liði Grindavíkur í kvöld en síðast þegar liðin mættust lét hann kappið bera fegurðina ofurliði og lét reka sig út úr húsi og lét ruslatunnu í Skógarselinu finna fyrir reiði sinni.

Hann vildi þó ekki meina að sú frammistaða hefði verið honum ofarlega í huga eða einhver auka hvatning til að spila vel í kvöld.

„Sá leikur er lengst í baksýnisspeglinum, ég var ekkert að hugsa um hann. Framkoma mín í þeim leik var algjörlega óásættlanleg. Ég brást liðinu þegar ég var rekinn út úr húsi en sem betur fer unnu þeir leikinn engu að síður. Við erum frábært lið og sýndu úr hverju þeir gerðir. Ég hætti að hugsa um þann leik fyrir löngu og setti fókusinn á framtíðina.“

Það voru mikil meiðsli í leikmannahópi Grindavíkur í kvöld og Kane hrósaði þeim leikmönnum sem stigu upp í fjarveru lykilmanna.

„Það er alltaf erfitt þegar lykilleikmenn eru frá. Breki er frábær varnarmaður og Daniel frábær skytta og gerir líka mikið af litlu hlutunum. Tekur fráköst og er líka bara stór skrokkur í vörninni. En það kemur alltaf maður í manns stað. Við erum með lið sem er fullt af fag- og atvinnumönnum

„Við erum með leikmenn sem vilja sanna sig og leikmenn sem hafa spilað í mjög góðum deildum. Raggi, Uno [Unnsteinn], Nökkvi, Valur. Þessir strákar voru klárir. Æfingavikan var góð. Við vissum að það væru sumir tæpir og myndu sennilega ekki spila. Jói lagði áherslu á að þá þyrftu aðrir að stíga upp og þeir gerðu það og við náðum í góðan sigur.“

Kane og Jeremy Pargo er vel til vina og Kane er í sjöunda himni með að vera aftur orðinn liðsfélagi hans.

„JP er minn maður! Hann er bróðir minn. Ég veit hvað hann getur gert á vellinum. Þegar hann er í sínu besta formi er erfitt að stoppa hann. Hann er frábær sendingarmaður og með auga fyrir smáatriðum. Virkilega klár leikmaður og með háa „körfuboltagreindarvísitölu“ og þekkir leikinn inn og út. Hann gerir hlutina auðveldari fyrir okkur alla, þetta er eins og að vera með auka þjálfara inni á vellinum. Frábært að hafa fengið hann aftur.“

Það er engu logið þegar Kane segir að Pargo sé í formi og hann virðist leggja allt í sölurnar til að halda sér í því.

„Hann er í frábæru formi. Hann hugsar mikið um mataræðið. Ég sting kannski uppá því við förum og fáum okkur hamborgara eða kjúklingavængi, og hann svarar bara: „Nah, ég verð að passa hvað ég borða!“ Ég er stoltur af honum, hann lítur vel út og heldur áfram að spila eins og hann gerir.“