„Frammi­staðan kannski ekkert allt­of góð en tvö góð stig“

Það má sennilega lýsa þessum leik sem dæmigerðum leik áhlaupa?

„Ég held að það sé alveg óhætt að segja það. Sóknarlega voru við á köflum alveg feikigóðir og láku gæðin hérna af ákveðnum mönnum á köflum. En þetta datt alltof langt niður fyrir minn smekk. Við náum í tvö stig. Við erum laskaðir og að við séum að ná að kreista út þessa sigra er bara ótrúlegt. Að við skulum vera í þessari stöðu sem við erum í miðað við hvernig við höfum æft í allan vetur, þetta verður rannsakað eftir einhver ár.“

Grindvíkingar fengu gott framlag af bekknum í kvöld og frá leikmönnum sem hafa ekki spilað mikið í vetur en þeir eru að glíma við töluverð meiðsli lykilmanna og voru án þriggja þeirra í kvöld.

„Bara hrós á þessa stráka, Ragga, Nökkva, Unnstein. Valur Orri kom með góðar mínútur líka. Byrjaði og stóð sig vel. Vonandi mun þetta nýtast okkar þegar upp er staðið. Núna fáum við góða pásu og náum vonandi að tjasla okkur saman og vera klárir í lokasprettinn.“

Arnór Tristan Helgason verður frá næstu vikurnar og þá meiddist Daniel Mortensen í síðasta leik og var ekki með í kvöld. Kristófer Breki Gylfason hitaði upp en spilaði svo ekki.

„Hann ætlaði að prófa að hita upp og sjá hvernig staðan væri á sér. Svo bara sá hann það fljótlega og tekin ákvörðun í samráði við sjúkraþjálfara að hann myndi ekkert spila. Svo er Ólafur að skríða saman og gat ekkert komið inn á í restina. Bara mikið hrós á þessa stráka sem eru að stíga upp og fá stærra hlutverk og meiri mínútur. Bara sáttur með tvö stig. „Frammistaðan kannski ekkert alltof góð en tvö góð stig.“

Það má kannski gera ráð fyrir því að þeir leikir sem eru framundan hjá Grindavík muni að einhverju leyti ráðast á því hvernig þessir minni spámenn stíga upp í fjarveru lykilmanna?

„Algjörlega. Eins og ég sagði áðan þá vonandi mun þetta hjálpa okkur og nýtast í lokin. Ég ætla svo sem ekkert að vera að kvarta og tuða yfir því hvernig staðan er og allt það þó þetta hljómi svolítið þannig. Nú kemur þessi landsleikjapása og vonandi náum við að tjasla öllum saman og verðum klárir í lokasprettinn.“