Löng bið Shiffrin á enda

Shiffrin var lang sneggst í mark í fyrri ferð dagsins í sviginu en þær Elín Elmarsdóttir van Pelt og Sonja Lí Kristinsdóttir kepptu einnig í greininni fyrir Íslands hönd í dag. Báðar féllu úr keppni í fyrri ferð dagsins.

Hin þýska Lena Durr var næst á eftir Shiffrin en hún missteig sig strax á fyrsta hliði brekkunnar í annarri ferðinni og varð þá ljóst að eitthvað stórkostlegt þyrfti til að Schiffrin fagnaði ekki sigri.

Enda var Schiffrin á heilli einni og hálfri sekúndu betri tíma en Camille Rast frá Sviss sem varð í öðru sæti. Anna Swenn Larsson frá Svíþjóð hlaut svo brons.

Shiffrin hefur verið ein allra besta skíðakona heims síðasta áratuginn eða svo og hefur raðað inn verðlaunum á heimsbikarmótum. Hún hefur alls unnið 108 gullverðlaun í heimsbikarnum.

Hún er þó aðeins að vinna til gulls á ÓL í þriðja sinn.

Henni tókst ekki að vinna til verðlauna á Vetrarólympíuleikunum í Peking árið 2022 og var að vinna sín fyrstu gullverðlaun frá því árið 2018, þegar hún hlaut gull í stórsvigi í Pyeongchang.

Gullverðlaun dagsins í svigi eru hennar önnur, eftir að hafa unnið Ólympíugull í svigi 18 ára gömul í Sochi árið 2014.