Þurfa að fresta leik á Ólympíu­leikunum vegna maga­kveisu

Opnunarleikur íshokkí-keppni leikanna átti upphaflega að fara fram í kvöld í Mílanó en nú hefur honum verið frestað til 12. febrúar, að því er Reuters greinir frá. Setningarhátíð leikanna er annað kvöld.

Þessi ákvörðun var tekin daginn eftir að fjórir leikmenn finnska liðsins voru settir í einangrun vegna magaflensu. Talið er að þeir séu með nóróveiru.

Aðeins tíu leikmenn voru á æfingu hjá finnska liðinu á fimmtudag.

„Allir hinir leikmennirnir eru annaðhvort veikir eða útsettir og þar af leiðandi í sóttkví,“ sagði Hanna Malmberg, samskiptastjóri, við sænska ríkisútvarpið Yle.

Á Ólympíuleikunum er krafa um að hafa fimmtán útileikmenn og tvo markverði tiltæka í leik.

Fréttastofan AP hafði áður greint frá því að Kanada yrði dæmdur sigur ef Finnland gæti ekki stillt upp liði, en Alþjóðaólympíunefndin (IOC) valdi ekki þá lausn.

Samkvæmt áætlun á Finnland að mæta Bandaríkjunum á laugardag.

Kanada er ríkjandi Ólympíumeistari í íshokkí kvenna en Finnland vann brons á leikunum í Peking árið 2022.