Sló í gegn með dramatískri af­sökunar­beiðni

Afsökunarbeiðni Nishida þegar hann sá boltann fara í höfuð konunnar var afskaplega dramatísk, og viðbrögð konunnar voru ekki síður vinaleg, þar sem hún hneigði sig hálfhlæjandi yfir öllu saman. Myndband af þeim hefur farið eins og eldur í sinu um netheima.

Hinn 26 ára gamli Nishida var að taka þátt í keppni í uppgjöfum í hálfleik á stjörnuleik í borginni Kobe í Japan.

Honum brá heldur betur í brún þegar uppgjöf hans fór beint í höfuðið á konunni sem kraup við völlinn. Til að sýna hve leiður hann var yfir þessu tók Nishida á rás og renndi sér svo á maganum að konunni, þar sem hann baðst auðmjúklega afsökunar. Þeirri afsökunarbeiðni var afar vel tekið eins og sjá má.

Nishida var í aðalhlutverki þetta kvöld því hann hjálpaði liði sínu að vinna 3-0 sigur og var valinn verðmætasti leikmaðurinn, samkvæmt frétt The Guardian.