Gengst nú við skila­boðunum um­deildu

„Sæl kæra […] nú er prófkjör í Samfylkingu á laugardaginn og það er óvenju opið og mikið verið að smala fólki til þátttöku,“ segir í skilaboðunum sem sýnd voru í Pallborðinu á Vísi í dag.

„Þetta kostar ekkert og ef fólki vil [sic] getur það skráð sig úr félaginu aftur eftir helgina. Mér finnst þetta mjög erfið barátta þar sem karl með enga reynslu en færægur [sic] á að koma í stað mín. Ég óttast um okkar mál og áherslur. Mig langar því að biðja um þinn stuðning og sendi þér hlekk á skráningu í von um að þú takir þátt. Hlý kveðja Heiða.“

Svona hljóðuðu skilaboðin sem Heiða sendi ónefndri konu í von um að fá hana til að skrá sig í Samfylkinguna í Reykjavík og veita henni atkvæði sitt í prófkjörinu á morgun.  

„Eftir allmikla leit verð ég að gangast við að hafa sent þennan póst fyrr í vikunni. Ég hef það eitt mér til afsökunar að á undanförnum 3 vikum hafa líklega þúsundir skilaboða farið frá mér til félaga í flokknum, auk vina og kunningja,“ skrifar Heiða í færslu á Facebook-síðu sinni í kvöld.

Fyrst einungis kannast við „brot af textanum“

Heiða segist fyrst ekki hafa munað eftir því að hafa sent skilaboðin og kannast „ekki við nema brot af textanum.“ Þá hafi ekki legið fyrir hver viðtakandinn væri.

„En hef nú fundið skilaboðin sem eru hluti af lengra samtali milli mín og þeirrar sem fékk póstinn frá mér. Sú hefur ávallt deilt skoðunum mínum á jafnréttismálum og taldi ég um einkasamtal að ræða okkar á milli. Í póstinum vísa ég í áhyggjur mínar af jafnréttisbaráttunni,“ bætir Heiða við.

„En þetta var kapp án forsjár, því ég vil ekki tala niður aðra frambjóðendur í minni baráttu. Ég bið Pétur Marteinsson afsökunar og hef einsett mér að gera betur.“

Fjöldi fólks hefur skráð sig í Samfylkinguna í Reykjavík í aðraganda prófkjörsins og um leið hlotið atkvæðisrétt í prófkjörinu á morgun. Frá því að ungliðahreyfing Samfylkingarinnar í Reykjavík hóf formlegan undirbúning fyrir prófkjörið um miðjan nóvember síðastliðinn, hefur skráðum félögum flokksins í Reykjavík fjölgað um 72 prósent.

Ætti að taka skjáskotum sem þessum með fyrirvara

Í Pallborðinu á Vísi í dag sagðist Heiða ekki muna eftir því að hafa sent skilaboðin, en útilokaði það þó ekki.

„Ég nefnilega man ekki eftir að hafa sent þessi skilaboð, nei. En ég get náttúrulega ekki útilokað það. Ég er búin að senda nokkur skilaboð.“

Frægð Péturs, það að hann sé fyrrverandi landsliðsmaður í fótbolta, finnst þér það hafa áhrif?

„Ég held að Pétur hafi sjálfur sagt að hann er að koma nýr inn í þetta, með enga reynslu. Mér finnst skrýtið ef flokkurinn velur það umfram konu sem er með mikla reynslu og hefur sýnt að hún getur náð miklum árangri. En það er auðvitað flokksins að velja.“

Þá bað hún fólk um að taka myndum sem þessum með fyrirvara.

Fréttin hefur verið uppfærð.