Hand­boltinn í fyrsta sæti en til­biður enn listagyðjuna

Blær sló í gegn í kvikmyndinni Hjartasteini og fékk Edduna fyrir besta leik í aðalhlutverki 2017. Hann lék svo í Berdreymi sem var valin besta myndin á Edduverðlaunahátíðinni fyrir tveimur árum.

Hinn 24 ára Blær samdi við Leipzig í Þýskalandi í sumar og er að spila sitt fyrsta tímabil sem atvinnumaður í handbolta. Hann er ekki búinn að leggja leiklistina á hilluna.

„Ég hef oft svarað þessari spurningu og vil aldrei útiloka neitt. Margir hafa spurt mig hvort ég sé hættur sem leikari eða hvað þá? Nei, ég hætti ekki. Maður hættir ekki neinu bara svona. Ég er ungur ennþá og maður á sinn starfsferil alveg þangað til maður er ég veit ekki hvað gamall,“ sagði Blær í samtali við Vísi. 

Stefnan að leika meira

Leikarar eiga alla jafna mun lengri feril en íþróttamenn og Blær segir að handboltinn sé í fyrsta sæti. 

„Ég veit ekki hvort ég sé að fara að leika í minni handboltapásu, á sumrin eða eitthvað svoleiðis. Ég útiloka ekki neitt. Og það er aldrei að vita nema ég taki eitthvað hlutverk og hvað þá þegar maður er kominn með þýskuna á hreint,“ sagði Blær í léttum dúr.

„Nei, nei, ég segi svona. Fókusinn er núna auðvitað á handboltann og það er ekkert annað hægt að gera þegar maður er atvinnumaður. Maður hugsar bara um sig sjálfan og æfir vel og vinnur sína heimavinnu og allt snýst núna um handbolta. Á Íslandi var kannski meiri tími fyrir að taka að sér hlutverk eða módelstörf, leika í auglýsingum eða gera eitthvað svona auka en núna snýst þetta svolítið mikið bara um handboltann og það var og er alveg mikil tilbreyting fyrir mig því áður fyrr var ég að halda mörgum boltum en núna er maður einhvern veginn bara að halda einum bolta á lofti og með fullan fókus á handboltann sem ég elska akkúrat núna. En í framtíðinni mun ég vonandi leika meira og það er alveg stefnan.“

Blær hefur skorað 35 mörk fyrir Leipzig í þýsku úrvalsdeildinni. Liðið, sem er í næstneðsta sæti með eitt stig, sækir Melsungen heim í kvöld.