Þjarmað að Santos á blaða­manna­fundi eftir leik

Undirritaður varð vitni að blaðamannafundinum þó að hann hafi ekki skilið það sem fór fram sökum þess að spurningarnar dundu á hinum sjötuga þjálfara á asersku og þulur þýddi þær yfir á portúgölsku. Öfugt var svo farið þegar Santos svaraði. Það var samt sem áður augljóst að 5-0 tap fór mjög illa í blaðamennina sem höfðu lagt land undir fót frá Asebaísjan til Íslands.

Fundurinn tók yfir 30 mínútur og fyrir íslensku blaðamennina sem sátu þarna virtist hann engan endi ætla að taka. Einn blaðamaðurinn frá Aserbaísjan hélt á míkrafóninum í mjög langan tíma og lét dæluna ganga þannig að túlkurinn og Santos þurftu að meðtaka talsvert magn upplýsinga í mjög reiðum tón. 

Einn af blaðamönnum asersku miðlanna vatt sér upp að blaðamanni eftir að fundi lauk og byrjaði á því að afsaka hvað þetta hefði tekið langan tíma. Hann var spurður að því hvað hafi orðið til þess að svo harkalega var þjarmað að Santos. 

Hann sagði þá að helsta þrætueplið hafi verið leikstíll sinna manna. Blaðamennirnir vildu að Aserbaísjan myndi stíga framar á völlinn en Santos sé á öndverðum meiði og vilji liggja til baka. Arnar Gunnlaugsson sagði síðar um kvöldið á sínum blaðamannafundi að erfitt væri að spila á móti liðum sem eru í jafn mikilli lág-blokk og andstæðingar kvöldsins voru og að helsta verkefnið hafi verið að þreyta þá sem og gerðist eins og úrslit leiksins bera með sér.