„Horft illum augum á þannig taktík í hlaupa­heiminum“

Þeir Hlynur og Sousa voru í sérflokki í maraþoninu en Sousa endaði fyrstur, á 02:23:55 eða tæpum þremur mínútum á undan Hlyni.

Aðstæður voru erfiðar vegna vinds og var Hlynur talsvert frá sínu markmiði um að slá brautarmetið (2:17:06), í þessu öðru maraþoni sínu á ferlinum. Í fyrstu tilraun sló hann Íslandsmetið þegar hann hljóp á 2:13:37 árið 2021 í Dresden.

Hlynur lýsti sinni upplifun af hlaupinu í gær í færslu á Instagram og sagði ýmislegt hafa mátt fara betur. Hann hafði vonast eftir aðstoð við að verjast vindinum, sérstaklega í fyrri hlutanum en keppendur í hálfmaraþoni hlupu of hægt til þess að hann gæti nýtt þá. Þá var lítil hjálp í Sousa og segir Hlynur hegðun Portúgalans ekki til fyrirmyndar:

„Hlaupið endaði sem einvígi á milli míns og Portúgala sem vann hlaupið í fyrra, en hann hljóp meter fyrir aftan mig alla okkar samleið og fékk þar gott skjól gegn vindinum. Það hefur aldrei verið minn stíll að gera slíkt enda er horft illum augum á þannig taktík í hlaupaheiminum, í staðinn fyrir að vinna saman og deila álaginu,“ skrifar Hlynur.

Það var þó fleira sem hefði mátt betur fara því Hlynur segir að sér hafi verið vísað út af brautinni á mikilvægum tímapunkti í hlaupinu.

„Eftir 30km er mér svo beint af brautarverði að beygja upp á Sævarhöfða í staðinn fyrir að halda beint áfram eins og við áttum að gera. Portúgalinn gerði ekki sömu mistök og græddi strax 50 metra bil á mig. Ég reyndi að elta hann niður en hafði eytt of mikilli orku fyrsta helminginn og ég byrjaði þá að lenda í vandræðum,“ skrifar Hlynur.

Hann fer þó ekki í neinar grafgötur með það að hann hefði getað betur og segir Sousa hafa átt skilið að vinna:

„Þegar öllu er á botninn hvolft þá hljóp hann betra hlaup en ég og á því sigurinn verðskuldaðan. Þetta var mitt annað maraþon sem ég klára og eitt af markmiðunum var að kynnast vegalengdinni betur, sem ég svo sannarlega gerði. Vill þakka öllum sem studdu mig á leiðinni, það gerði helling fyrir mig, sérstaklega í endann.“