Stjörnukonur lögðu Tindastól af velli með sannfærandi hætti í Bestu deild kvenna í dag. Stjarnan var betri aðilinn nánast allan tímann og Stólarnir áttu í stökustu vandræðum með að skapa sér færi. Niðurstaðan 3-0 og Stjarnan hoppar upp í 6. sæti.

Leikur dagsins byrjaði í miklu jafnvægi og voru bæði lið í hinum klassísku þreifingum á hvoru öðru. Tindastóll reyndi að vera beinskeyttar upp miðjuna til að finna Makala Woods og Stjörnukonur sáu færi á því að sækja upp hægra megin þar sem mikið pláss skapaðist oft og tíðum. Fá færi sköpuðust en þau voru fleiri frá Stólunum og besta færi fyrri hálfleiksins var þegar Makala Woods skaut í stöngina á 19. mínútu. Vera Varis hinsvegar náði að grípa boltann áður en frákastið skapaði vesen.

Staðan 0-0 í hálfleik og fátt um fína drætti í raun og veru.

Stjörnukonur voru fljótar að taka völdin í leiknum í seinni hálfleik. Stólarni náðu alls engum takti í sinn leik og einangraðist Makala Woods upp á toppnum og fékk úr litlu að moða. Það hjálpaði heldur ekki gestunum að Nicola Hauk, miðvörður, meiddist á ökkla og þurfti að fara út af en níu mínútum síðar á 60. mínútu brutu heimakonur ísinn. Þær höfðu bankað fast á hurðina en Ingibjörg Lúcía Ragnarsdóttir náði að brjóta hana niður.

Stjarnan komst upp vinstra megin þar sem Gyða Kristín Gunnarsdóttir átti frábæra sendingu út í teiginn á Ingibjörg Lúciu sem kom á mikilli ferð inn í teiginn við vítateigslínuna og kláraði meistaralega með viðstöðulausu skoti í slánna og inn.

Tindastóll náði ekki að eflast við mótlætið en Stjörnukonur héldu upp sama takti og taki á leiknum. Aftur urðu Stólarnir fyrir skakkaföllum þegar annar miðvörður, Katherine Pettet, meiddist og þurfti skiptingu. Það gerðis á 74. mínútu en strax tveimur mínútum seinna, þegar Stólarnir virtust enn vera að skipuleggja sig, var Úlfa Dí Krey Úlfarsdóttir búin að tvöfalda forskotið.

Andrea Mist Pálsdóttir lyfti þá boltanum yfir varnarlínu gestanna á Úlfu Dís sem var komin í mjög góða stöðu sem reyndar þrengdist en Úlfa kláraði virkilega vel í nær hornið og fagnaði gríðarlega. 

Leikurinn byrjaði að fjara út eftir annað mark heimakvenna og voru gestirnir ólíklegir til að klóra í bakkann. Varamaðurinn Jana Sól Valdimarsdóttir fullkomnaði sigurinn með þriðja markinu og sýndi góða fótamennt þegar hún tók við boltanum í markteignum, lagði hann fyrir sig og renndi honum í netið.

Lokaniðurstaðan 3-0 fyrir Stjörnuna í afar sannfærandi sigri. Stjörnukonur hoppa því upp í sjötta sæti þar sem Fram tapaði stórt gegn Blikum og missir Garðbæinga fram úr sér á markatölu.

Atvik leiksins

Gamla klisjan segir að mörk breyti leikjum en meiðsli gera það líka. Það er hægt að leiða líkur að því að meiðsli tveggja miðvarða hjá Tindastól hafi gert þeim erfitt fyrir að verjast og Stjörnukonur gengið á lagið og tryggt sér sigurinn.

Stjörnur og skúrkar

Andrea Mist Pálsdóttir var frábær í dag á miðjunni og réð sýningunni. Hún var að senda sínar konur í gegn upp kantana sem skapaði uslann og mörkin sem dugðu til í dag.

Tindastóll náði ekki miklum krafti eða takti í sinn leik í dag. Genevieve Crenshaw, markvörður, var framan af besti maður þeirra en fékk á sig þrjú mörk að lokum en hún gat lítið í því gert þegar fór að tínast úr varnarlínunni.

Umgjörð og stemmning

Fáir mættir í stúkuna í kvöld og má fara að ræða það hvort þessi tímasetning sé að hjálpa til við að fá áhorfendur á völlinn. 103 sálir létu sjá sig í kvöld og ungir stuðningsmenn Stjörnunnar létu vel í sér heyra á köflum.

Dómarinn

Bríet Bragadóttir hélt um taumana og flautuna í dag og gerði afskaplega vel í sínum aðgerðum. Þetta var ekki erfiður leikur að dæma en allar hennar ákvarðanir standast skoðun og vel það.

Viðtöl:

Halldór: Gæti orðið dýr leikur

Þjálfari Tindastóls, Halldór Jón Sigurðsson, var nokkuð léttur í lundu þrátt fyrir tap fyrir Stjörnunni í kvöld og hafði orð á því fyrir viðtal að þetta hafi nú ekki farið eins og hann ætlaði fyrir leik. Þetta hljóta samt að vera svekkjandi niðurstaða og frammistaða.

„Ég get verið sammála því. Þetta var jafn leikur í fyrri hálfleik, það var varla færi í fyrri hálfleik. Kannski tvö skot hjá okkur og eitthvað svipað hjá þeim. Svo lendum við í því að missa tvo miðverði út hjá okkur og það er risastórt hjá okkur. Þetta skiptir miklu máli fyrir okkur eins og sást í allavega tveimur af þessum mörkum sem við fengum á okkur. Það munar mikið um þessa tvo frábæru leikmenn sem við erum með. Við erum ekki með það stóran hóp að við getum fyllt upp í þessi skörð sem þær skilja eftir. Því miður. Heilt yfir var Stjarnan svo bara betri í seinni hálfleik og áttu sigurinn skilið.“

Halldór átti þarna við að Nicola Hauk og Katherine Grace Pettet, miðverðir, þurftu frá að hverfa vegna meiðsla. Eru einhverjar fréttir af þeim svona skömmu eftir leik?

„Nicola snýr upp á ökklann sinn við að verjast í upphafi seinni hálfleiks og svo fær Grace högg á mjöðmina og átti í erfiðleikum með að hlaupa þannig að það var ekki hægt að hafa hana inn á í rauninni. Þær verða eitthvað frá og vonandi ekki mjög lengi því við megum ekki við því. Þær eru hörkugóðir leikmenn og búnar að standa sig frábærlega í sumar.“

Þannig að þetta gæti hafa orðið ansi dýr leikur fyrir Tindastól þegar öllu er á botninn hvolft.

„Já hann gæti orðið það. Það eru bara þrjú stig núna, stig sem við ætluðum okkur vissulega, en hann gæti orðið dýrari ef þær verða lengi frá. Við vonum bara það besta í þessu og höldum ótrauð áfram og höldum áfram að reyna að ná góðum úrslitum. Sem hefur gengið ágætlega undanfarið.“

Er það eitthvað sérstakt sem þjálfarinn þarf að segja við sína leikmenn eftir þennan leik?

„Bara upp með hausinn og áfram. Stundum tapar maður leikjum og Stjarnan átti þennan sigur skilið. Við lentum í skakkaföllum og þær spiluðu vel í dag þannig að stundum er þetta bara þannig. Svona er bara fótboltinn og það er bara áfram með lífið og næst er það Þróttur heima.“

Jóhannes Karl: Það er gott að vera komin á blað í seinni umferð

Jóhannes Karl Sigursteinssons þjálfari Stjörnunnar mátti vera himinlifandi með niðurstöðuna í sigri hans kvenna á Tindastól í kvöld.

„Já ég er mjög sáttur. Varnarlega þéttar og náðum að loka á þær. Eins og ég sagði fyrir leik þá eru þær rosalega beinskeyttar, geta farið hratt og í langa bolta. Eru með gæði fram á við í að berjast um bolta eitt og tvö og ég er mjög ánægður með það hvernig við náðum að höndla það. Sóknarlega vissum við alveg að við myndum fá einhver færi. Við getum haldið boltanum, fært hann frá vinstri til hægri og reynt að búa eitthvað til. Mér fannst gæði hjá okkur á síðasta þriðjungi í seinni hálfleik, það var dálítið af sendingarfeilum í fyrri en þegar það fór að tikka þá fengum við nóg af færum.“

Það var markalaust í hálfleik og Jóhannes Karl var spurður hvort hann hafi þurft að breyta einhverju í hálfleik.

„Í rauninni ekki. Við fórum bara yfir það sem við höfum verið að fara yfir á æfingasvæðinu í vikunni og minntum okkur á það að það voru ekki hlaupin og hreyfingarnar sem klikkuðu í fyrri hálfleik heldur sendingarnar. Þegar við fín tjúnuðum það þá kom þetta.“

Það er langt síðan Stjarnan vann síðast fótboltaleik. Þessi sigur hlýtur að gefa liðinu helling?

„Já, síðasti sigur kom í júní en bara þrjár umferðir síðan. Það er gott að vera komin á blað í seinni umferð, þetta var fyrsti sigur okkar í seinni umferð. Við þurftum að bíða eftir honum og þetta var sterkt.“

Stjarnan situr í 6. sæti núna og ætti að vera að horfa upp frekar en niður. Hvernig sér Jóhannes áframhaldið fyrir sér?

„Við eigum klárlega að horfa upp. Ég er ekki með töfluna á hreinu en ef Valur er líklega að fara með Þór/KA í 18 stig og það þýðir að það eru bara þrjú stig í fjórða sætið og við verðum að horfa þangað.“