Þýsku meistararnir urðu að segja upp öllum leik­mönnunum sínum

Það var vitað að félagið væri að róa lífróður til að reyna að bjarga félaginu. Nýjustu fréttirnar eru þær að félagið þurfti að segja upp öllum leikmönnum sínum.

Félagið hafði verið tekið til gjaldþrotaskipta fyrir einni og hálfri viku síðan en frá og með gærdeginum þurfa leikmenn þess að leita sér að nýju liði.

Þetta gerist stuttu fyrir nýtt tímabil. Danska ríkisútvarpið segir frá.

„Þetta var ekki auðveld ákvörðun en óumflýjanlegt eftir nákvæma skoðun,“ sagði Holger Leichtle, sem er yfirumsjónarmaður gjaldþrotaskiptanna.

„Það er ekki réttlátt að halda leikmönnum föstum hjá félaginu í þessum kringumstæðum. Við létum félagið vita af ákvörðun okkar í dag,“ sagði Leichtle.

Ludwigsburg hét áður SG BBM Bietigheim og var í úrslitaleik Meistaradeildarinnar árið 2024.

Stjórn félagsins reyndi að bjarga félaginu með því að biðla til félaga á svæðinu en það gekk ekki eftir.

„Við reyndum okkar besta en á endanum var það því miður ekki nóg til að brúa bilið,“ skrifaði félagið á heimasíðu sinni.

Þetta er í annað skiptið á sex mánuðum þar sem eitt besta kvennahandboltafélag Evrópu þarf að losa sig við leikmenn sína en það gerðist líka þegar norska stórliðið Vipers fór á hausinn í ársbyrjun þrátt fyrir að vinna Meistaradeildina 2021, 2022 og 2023.

Ludwigsburg vann tvöfalt á síðustu leiktíð og hefur orðið þýskur meistari undanfarin fjögur tímabil. Liðið vann sjö af átta titlum í boði í þýska handboltanum frá og með 2022.