For­dæma Hamas og segja á­form um „mannúðar­borg“ ó­við­unandi

Í yfirlýsingu, sem Þorgerður Katrín hefur undirritað ásamt utanríkisráðherrum Ástralíu, Austurríkis, Belgíu, Bretlands, Danmerkur, Eistlands, Finnlands, Frakklands, Hollands, Írlands, Ítalíu, Japans, Kanada, Lettlands, Litháens, Lúxemborgar, Nýja Sjálands, Noregs, Portúgals, Póllands, Slóveníu, Spánar, Sviss og Svíþjóðar, segir að þjáning íbúanna á Gasa hafi náð nýjum hæðum.

Ísrael verði að uppfylla skyldur sínar

Ráðherrarnir fordæma hvernig staðið sé að veitingu mannúðaraðstoðar á Gasa og dráp á óbreyttum borgurum, þar með talið börnum sem eigi sér það markmið eitt að tryggja sér aðgengi að grunnþörfum eins og vatni og mat.

„Hryllilegt sé að meira en 800 Palestínumenn hafi verið drepnir við slíkar aðstæður. Óviðunandi sé að Ísrael neiti óbreyttum borgurum um aðgengi að mannúðaraðstoð. Ísrael verði að uppfylla skyldur sem alþjóðleg mannúðarlög fela þeim á hendur,“ segir í tilkynningu á vef Stjórnarráðsins um sameiginlegu yfirlýsinguna.

Í yfirlýsingunni eru Hamas-samtökin einnig fordæmd fyrir að halda fólki áfram í gíslingu, og kallað eftir því að öllum gíslum verði sleppt án tafar og án skilyrða. Vopnahlé feli í sér bestu vonina um að hægt verði að fá gíslana lausa, og binda þannig enda á þjáningar ættingja þeirra. 

Mannúðarborg ekki í myndinni

Ráðherrarnir segja að tillögur ísraelskra ráðamanna um flutning Palestínumanna í svokallaða „mannúðarborg“ á Gasa vera algjörlega óviðunandi. Varanlegir nauðungarflutningar fólks séu brot á alþjóðamannúðarlögum.

„Þá lýsa utanríkisráðherrarnir sig algerlega andsnúna öllum lýðfræðilegum breytingum eða breytingum á yfirráðum á landsvæði á Vesturbakkanum. Áform ísraelskra stjórnvalda í þeim efnum og áframhaldandi landtaka á Vesturbakkanum og Austur Jerúsalem sé brot á alþjóðalögum og grafi undan tveggja ríkja lausninni svonefndu.“

Fram undan er ráðstefna í New York á vegum Sameinuðu þjóðanna um hina svokölluðu tveggja ríkja lausn, en hún fer fram 28. til 30. júlí.

„Stjórnvöld í Frakklandi og Sádi-Arabíu hafa staðið straum af skipulagningu ráðstefnunnar, sem upphaflega átti að fara fram 17.-20. júní en var frestað þá vegna hernaðarátaka milli Ísraels og Írans. Tilgangur ráðstefnunnar er sá að leita leiða til að hrinda tveggja ríkja lausninni í framkvæmd. Þorgerður Katrín Gunnarsdóttir utanríkisráðherra mun sækja ráðstefnuna fyrir Íslands hönd.“