Aftur kjörin for­maður þrátt fyrir fjár­dráttinn sem felldi hana

Boðað var til formannskjörs í Siamut, sem á sæti í grænlensku landsstjórninni, eftir að Erik Jensen sem leiddi flokkinn í kosningum í mars ákvað að stíga til hliðar. Flokkurinn fékk sína verstu útreið í sögunni í kosningunum.

Hammond bar sigurorð af Vivian Motzfeldt, utanríkisráðherra Grænlands og starfandi formanni Siamut, í formannskjörinu, að því er kemur fram í frétt danska ríkisútvarpsins.

Eftir sigurinn sagðist Hammond ekki hafa nein áform um að hrófla við samsteypustjórninni eða að Siamut hætti þátttöku í henni. Flokkurinn þyrfti hins vegar sífellt að meta það hvort að samstarfið þjónaði hagsmunum hans og stefnumálum hans.

Hammond er sögð einarðari stuðningskona sjálfstæðis Grænlands en forverar hennar.

Rekin úr flokknum eftir annað fjárdráttarmál

Hammond var fyrst kjörin formaður Siamut eftir að flokkurinn missti sæti sitt í landsstjórninni eftir kosningar árið 2009. Undir stjórn hennar komst flokkurinn aftur á sigurbraut fjórum árum síðar og varð hún fyrsta konan til að gegna embætti formanns landsstjórnarinnar á Grænlandi.

Það sama ár, 2013, var hins vegar upplýst að Hammond hefði notað opinbert fé til þess að greiða fyrir eigin ferðalög, drykki og veitingahúsaferðir. Hún sagði af sér sem formaður landsstjórnarinnar árið 2014 og leiðtogi flokksins sömuleiðis.

Hneykslismálum Hammond var ekki þar með lokið. Hún náði kjöri til danska þingsins árið 2015 en eftir að í ljós kom að hún hefði misnotað greiðslukort frá þinginu var hún rekin úr Siamut ári síðar.

Árið 2018 bauð Hammond sig fram fyrir Nunatta Qitornai, klofningsflokk úr Siamut, í grænlensku kosningunum en án árangurs. Eftir það tók Siamut aftur við henni.