Grunur um tvö kyn­ferðis­brot á bíladögum

„Það er búið að vera nóg að gera hjá okkur. Fangaklefar eru nánast fullir eftir nóttina og það eru minni háttar líkamsárásarmál. Það er grunur um tvö kynferðisbrotamál, sem er í farvegi hjá rannsóknardeild,“ segir Börkur Árnason varðstjóri hjá lögreglunni á Norðurlandi eystra í samtali við fréttastofu. 

Að öðru leyti hafi helgin gengið ágætlega hjá lögreglunni. Börkur segir að fjölmennt hafi verið Akureyri í nótt. Hann gerir ráð fyrir talsverðri umferð út úr bænum seinni partinn í dag og í kvöld. 

„Við gerum ráð fyrir því að senda bíl á þessum tíma í Öxnadal og Hörgárdal, sem eru á okkar varðsvæði. Þannig að við sinnum góðu eftirliti hérna í okkar umdæmi.“