„Hjólið fellur á flugi, auð­vitað er það al­var­legt“

Þetta segir Ragnar Guðmundsson, sem stýrir rannsókn Rannsóknarnefndar samgönguslysa á atviki þar sem nefhjól úr flugvél á flugi hrapaði niður á Austurvöll og hafnaði á stéttinni. Mildi var að hjólið hafnaði ekki á fólki eða nærliggjandi byggingum.

Vettvangsrannsókn sé lokið, og unnið sé að því að safna gögnum.

„Já það er svosem hægt að staðfesta það að hjólið féll af vélinni við Austurvöll,“ segir Ragnar.

Hann hafi sjálfur aðallega verið að skoða flugvélina og þann þátt sem snýr að henni og flugvellinum. Ekkert hafi komið fram hingað til sem bendi til einhverrar bilunar í vélinni.

„En við erum enn að safna gögnum, þeim þætti er ekki lokið en við höfum ekki séð neitt sem bendir til þess,“ segir hann.

Ragnar segir að þáttur hans sé aðallega að rannsaka hvernig þetta gat gerst, og það sé of snemmt að segja til um það hvernig þetta æxlaðist.

„En við erum bara í frumrannsóknum að safna gögnum. Rannsóknin snýst um að leiða það í ljós hvernig það gerðist,“ segir Ragnar.

„Við erum mjög heppin að ekki hafi farið verr. Það er náttúrulega aðalatriðið að ekki hafi orðið slys á fólki,“ segir Ragnar.