„Hann hefði getað fót­brotið mig“

Atvikið átti sér stað á 28. mínútu. Martinelli komst framhjá Norgaard en var tæklaður harkalega til jarðar.

„Ég hef ekki séð tæklinguna en, að mínu mati, ef fóturinn hefði verið á jörðinni hefði hann getað fótbrotið mig. Hann sagði við mig að þetta hafi verið óvart og ég trúi því, en samt, hann hefði getað fótbrotið mig. Fyrir mér er þetta rautt spjald. Ég þarf að sjá þetta aftur til að vera viss en mér fannst þetta gróft brot“ sagði Martinelli í viðtali eftir leik.

„Það var enginn illur ásetningur að baki en þegar ég lít til baka var tæklingin töluvert harkalegri en ég ætlaði mér. Ég myndi aldrei gera þetta viljandi“ sagði Norgaard í viðtali eftir leik.

Þjálfarar liðanna tóku undir með leikmönnum sínum. Mikel Arteta var ósáttur að sjá ekki rautt spjald fara á loft en Thomas Frank fannst gult spjald sanngjarnt, jafnvel heldur hart.

Martinelli fótbrotnaði ekki og kláraði leikinn en Arsenal missti Thomas Partey og Jorginho af velli vegna meiðsla. Þá var Ben White einnig fjarverandi.

Arteta gat ekki svarað því hvað amaði að Partey, en sagði Jorginho hafa fundið til í rifbeinum og átt erfitt með andardrátt. Hann var óviss um hvort þeir tveir og Ben White yrðu orðnir leikhæfir þegar Arsenal mætir Real Madrid næsta miðvikudag.