Eigin­kona bassa­leikara Weezer skotin af lög­reglu

Jillian Lauren, rithöfundur og eiginkona Scotts Shriner, bassaleikara Weezer, er ekki sögð lífshættulega særð eftir uppákomuna sem átti sér stað við heimili þeirra hjóna í Eagle Rocks-hverfi Los Angeles, að sögn AP-fréttastofunnar.

Lögreglan lýsir atvikum þannig að lögreglumenn hafi leitað að þremur mönnum sem voru grunaðir um að stinga af frá árekstri en Lauren var ekki á meðal þeirra. Þegar lögreglumenn eltu einn þeirra grunuðu sem var sagður hafa hlaupið inn í bakgarð húss rákust þeir á Lauren vopnaða skammbyssu í garðinum við húsið á hliðina.

Lauren á að hafa neitað skipunum lögreglumanna um að kasta byssunni frá sér og þess í stað miðað henni á þá. Hún hafi síðan verið skotin af lögreglumönnum og flúið særð inn í hús sitt þar sem hún var handtekin. Lögreglan sakar hana um tilraun til manndráps en hefur ekki sagt hvort hún hleypti af byssunni áður en hún var skotin. Níu millímetra skammbyssa fannst á heimilinu.

Slúðurmiðillinn TMZ heldur því fram að Lauren hafi verið skotin í öxlina og þá hlaupið inn í húsið. Hún og barnfóstra hennar hafi skömmu síðar komið út og gefið sig fram.

AP segir að Lauren hafi enn ekki komið fyrir dómara og að hvorki fulltrúar hennar né Weezer hafi svarað fyrirspurnum um málið. Ekkert bendir til þess að Shriner hafi verið þátttakandi í atburðarásinni.

Lauren er metsöluhöfundur og hefur verið gift Shriner frá árinu 2005. Shriner gekk til liðs við Weezer snemma á fyrsta áratug þessarar aldar. Stjarna hljómsveitarinnar reis hæst á 10. áratug síðustu aldar með „Bláu plötunni“ svonefndu sem innihélt smelli eins og „Buddy Holly“, „Say it ain't so“ og „Undone (The Sweater Song)“.

Weezer á að koma fram á Coachella-tónlistarhátíðinni í Kaliforníu um helgina.