Feðgarnir nú aftur einu hlut­hafarnir í Eyri Invest

„Við fögnum niðurstöðu aðalfundar sem við teljum afar farsæla lausn fyrir alla hluthafa. Þetta eru mikilvæg tímamót í sögu Eyris Invest. Fyrir hönd stjórnar vil ég þakka hluthöfum og samstarfsaðilum fyrir gott og farsælt samstarf á undanförnum misserum. Við hlökkum til að fylgjast með félaginu á komandi árum.“ segir Friðrik Jóhannsson, stjórnarformaður Eyris Invest en félagið fagnar 25 ára afmæli á þessu ári.

Í tilkynningu frá Eyri Invest kemur fram að félagið muni afhenda hluthöfum 3.032.714 hluti í JBT Marel og muni að loknu uppgjöri eiga 284.948 hluti sem samsvari 0,55 prósent eignarhlut í JBT Marel.

Samkvæmt tilkynningunni gerði Eyrir Invest upp allar skuldbindingar við lánveitendur í janúar og er skuldlaust. Þar kemur einnig fram að tillagan hafi verið í samræmi við niðurstöðu valfrjáls tilboðs til hluthafa um þátttöku í fyrirhugaðri hlutafjárlækkun og nam þátttaka hluthafa í hlutafjárlækkuninni um 91 prósent af útistandandi hlutafé. Allir hluthafar félagsins kusu að taka þátt í tilboðinu að hluta eða öllu leyti.

Eyrir Invest var stofnað árið 2000 af Þórði Magnússyni og Árna Oddi Þórðarsyni. Síðar bættust við aðrir hluthafar, þar á meðal fjársterkir einkafjárfestar og stofnanafjárfestar. Eftir hlutafjárlækkunina verða stofnendur Eyris Invest einu hluthafar félagsins með jafnan eignarhlut, Þórður Magnússon í eigin nafni og Árni Oddur Þórðarson í gegnum eignarhaldsfélögin Sex álnir ehf. og 12 Fet ehf. sem eru að fullu í hans eigu.

Eyrir Invest stofnaði félagið Fræ Capital í þeim tilgangi að taka yfir sprotastarfsemi félagsins og einfalda uppgjör við hluthafa þess. Fræ Capital fer nú með eignarhluti í óskráðum félögum og sjóðum sem áður voru í eigu Eyris. Fræ Capital er vel fjármagnað og í sterkri stöðu til framtíðar.

Eyrir Invest var samkvæmt tilkynningunni kjölfestufjárfestir í Marel frá árinu 2005 og hafði áhrif á vöxt og þróun félagsins. Á þeim tíma jukust tekjur Marel úr 129 milljónum evra í yfir 1.700 milljónir evra og starfsmannafjöldi úr 800 í yfir 7.000 í yfir 30 löndum.

Stjórn Eyris Invest var endurkjörin á aðalfundi en í kjölfar uppgjörs við fráfarandi hluthafa verður boðað til hluthafafundar þar sem ný stjórn tekur við.

Stjórn Eyris Invest var endurkjörin á aðalfundi en í kjölfar uppgjörs við fráfarandi hluthafa verður boðað til hluthafafundar þar sem ný stjórn tekur við.