„Ég er stríðs­maður og hef lent í þessu áður“

„Þriggja vikna frí og leikir gegn Keflavík eru alltaf skemmtilegir leikir og þeir mæta með mikinn karakter. Við vissum að við þyrftum að verja heimavöllinn eftir að hafa tapað síðasta leik,“ sagði Kane í viðtali eftir leik.

„Við ætluðum að mæta til leiks og vera öflugir frá byrjun til enda. Setja skotin, spila vörn og gefa allt í leikinn. Við gerðum það og unnum.“

Kane fór þó ekkert fram úr sér þrátt fyrir sigurinn enda leikur Grindavíkur langt frá því að vera gallalaus í kvöld.

„Við tökum bara einn leik í einu. Við erum ekki að horfa á þriðja leikinn eða leikinn þar á undan. Við tökum næsta leik og höldum áfram þaðan. Við erum ekki að horfa á úrslitakeppnina, við viljum enda deildina vel. Byggja upp liðsanda og stilla okkur vel saman.“

Kane mætti í viðtalið með blóðuga vör eftir harða baráttu í leiknum.

„Algjörlega, þetta er ekki neitt. Ég er stríðsmaður og hef lent í þessu áður. Þetta er ekki neitt.“

Kane skoraði 27 stig í leiknum í kvöld. Hann tók þar að auki 10 fráköst, gaf 6 stoðsendingar og stal 4 boltum. Fimm stjörnu frammistaða og þar að auki setti hann tvö stór þriggja stiga skot á gríðarlega mikilvægu augnabliki í fjórða leikhluta.

„Það var mjög mikilvægt eftir að hafa klúðrað fjórum vítum og skotið tveimur loftboltum. Þeir voru að skipta mikið og hann bakkaði niður. Ég þurfti að skjóta með sjálfstrausti og setti nokkur niður.“

Kane tók nokkra unga Grindvíkinga með sér í viðtalið og vildi með því borga til baka fyrir góðan stuðning í kvöld.

„Þetta eru strákarnir mínir, þeir styðja okkur alltaf. Við getum ekki unnið án þeirra og þess vegna tók ég þá með mér.“