Dúbaí-súkkulaðið um­talaða: „Þetta er galin sala“

Það er ekki nýtt af nálinni að samfélagsmiðlar geti haft áhrif á kauphegðun Íslendinga. Hver man ekki eftir gúrkusalatinu í lok síðasta árs og Prime-drykkina sem allir unglingar urðu bara að smakka?

Nú er það Dúbaí-súkkulaðið sem hefur horfið úr hillum verslana Bónus á aðeins nokkrum klukkutímum.

Björgvin Víkingsson, framkvæmdastjóri Bónus, segist enn vera að reyna að ná utan um þessa miklu eftirspurn. Tvær sendningar hafa borist á síðastliðnum vikum og er von á þeirri þriðju í næstu viku. Súkkulaðið er innflutt frá Tyrklandi en verslunin ákvað að prófa að selja góðgætið eftir að starfsmaður í innkaupadeild hafði séð umræðuna á TikTok.

Björgvin segir verðið kunna að hljóma skrýtið og í hærra lagi fyrir sælgæti í verslunum Bónus þar sem stykkið kostar 1198 krónur. Þrátt fyrir það hafi fólk keypt tíu til tólf stykki í einu.

„Við höfum sjaldan séð svona mikla eftirspurn eftir einhverju, á sama tíma og framboðið er alltaf jafn takmarkað. Við tókum eina sendingu sem við töldum vera frekar stóra, en hún seldist upp á tveimur dögum.

Seinni sendingin kom inn síðastliðinn miðvikudag klukkan 10 og var uppseld klukkan 16. Í þetta skiptið dreifðum við vörunni í átta búðir og stilltum magnið í samræmi við það. Við höfðum ekki trúað því hversu hratt þetta seldist upp. Sem skemmtilegt grín má nefna að ég fékk ekki einu sinni eitt stykki sjálfur til að taka með heim,“ segir Björgvin kíminn.

„Þetta er galin sala.“

Hefur þú smakkað það sjálfur?  

„Já, og það kom mér á óvart hversu ótrúlega gott þetta er. Ég var ekki viss hvað ég var að fara út í en skil alveg pínu hæpið. Þetta er allt öðruvísi – þú færð ekkert svipað þessu,“ segir hann.

Græn og ómótstæðileg fylling

Súkkulaðið er þekkt fyrir ríkulega grænlita fyllingu með sérstakri áferð sem er búin til úr pistasíukremi og svokölluðu kadayif deigi. Kadayif er eins konar smjördeig sem er notað í bakstur í Miðaustur löndum.

Hér að neðan má sjá nokkur innslög af fólki á samfélagsmiðlinum TikTok sem hafa tekið þátt í trendinu.