Erfiðara að manna í frí­stund í austur­hluta borgarinnar

Í minnisblaðinu kemur einnig fram að í síðustu viku, þann 20. nóvember, voru 194 börn á biðlista eftir plássi í frístund af 4.062 börnum í borginni. 3.868 börn höfðu þá fengið samþykkta vistun, þar af 3.575 börn í fullri umbeðinni vistun en 293 í hlutavistun.

Í minnisblaðinu kemur fram að öll frístundaheimili hafi náð umbeðinni vistun í 1. bekk, 97 prósent frístundaheimilanna hafa náð umbeðinni vistun í 2. bekk þar sem eitt frístundaheimili er með hlutavistun fyrir einhver börn, 64 prósent frístundaheimilanna hafa náð umbeðinni vistun í 3. bekk og 54 prósent í fjórða bekk.

Í frístundaheimili/sértækar félagsmiðstöðvar á eftir að ráða í 31,6 stöðugildi eða 64 einstaklinga samanborið við 38,8 stöðugildi þann 9. október síðastliðinn og 28,5 stöðugildi 21. nóvember 2023. Ráðið hefur verið í um 90 prósent stöðugilda.

Mönnun í leikskólum

Í minnisblaðinu segir að hraðar hafi tekist að ráða inn í leikskóla en í fyrra en að róðurinn sé nú svipaður og hann var í nóvember í fyrra. Þá kemur fram að búið sé að ráða í 15 stöðugildi en fólk eigi enn eftir að hefja störf. Þá geri leikskólastjórar jafnframt ráð fyrir því að þeir muni þurfa að ráða í um 47,5 önnur stöðugildi í stað núverandi starfsfólks sem mun fara í leyfi eða hætta störfum á komandi vikum og mánuðum. Talsvert sé um að starfsfólk hafi sagt upp frá og með áramótum.

Þá kemur fram að fullmannað sé í 42 prósent leikskóla í Reykjavík og að rúman fimmtung leikskóla vanti starfsfólk í eitt eða færri stöðugildi. Annan fimmtung vanti í eitt til 2,5 stöðugildi en tíu leikskólar eiga eftir að ráða í 2,5 til 6 stöðugildi.

Árelía Eydís Guðmundsdóttir formaður skóla- og frístundaráðs segir allt kapp lagt á að ráða í þau stöðugildi sem eigi eftir að ráða í svo hægt verði að veita þeim öllum pláss sem enn bíða.

„Mönnunin og biðlistarnir haldast auðvitað fullkomlega í hendur. Eins og kemur fram í minnisblaðinu er búið að ráða í 90 prósent stöðugilda. Það er misjafnlega þungt ástandið í borgarhlutum og það hefur verið erfiðara að manna í austurhlutanum,“ segir Árelía.

Erfiðara að manna í austurhluta borgarinnar

Stöðurnar séu að stórum hluta mannaðar af skólafólki sem margt hafi ekki tíma til að ferðast langar vegalengdir til að komast í vinnuna, sérstaklega ef þau búa ekki sjálf í þessum borgarhluta.

„Við erum loks að ná inn börnum í 3. og 4. bekk í Fjósinu í Sæmundarskóla til dæmis þannig að við erum á góðri leið. Við erum bjartsýn á að þetta náist,“ segir Árelía.

Hún segir haustin alltaf erfið en að það ætti að nást jafnvægi fljótlega á stöðunni. Hún segist bjartsýn á að þau 194 börn sem enn bíða muni fá pláss í frístund í vetur.

„Þetta hefur yfirleitt verið þannig að haustið er erfiðara. Við tökum fyrst inn þau börn sem eru í forgangi og svo förum við í árgangana,“ segir Árelía en fyrst eru tekin yngri börn.

Eins og fram kemur í minnisblaðinu hafa öll börn í 1. bekk sem hefur verið óskað eftir vistun fyrir fengið hana og nær allir í 2. bekk. Hlutföllin eru svo verri í 3. og 4. bekk. Í hverjum árgangi í Reykjavík eru um 1.500 börn og miðað við að aðeins 194 börn eru á biðlista má gera ráð fyrir að alls ekki allir foreldrar í 3. og 4. bekk hafi óskað eftir vistun fyrir barnið.

Hún segir að skóla- og frístundaráð taki næst stöðuna 8. janúar og séu mjög vakandi yfir þessari stöðu. Á meðan sé borgin að auglýsa á fullu eftir fólki.

„Það er líka gaman að segja frá því að starfsánægja í félags- og frístundamiðstöðvum er mjög mikil. Fólk sem kemur þangað inn er mjög líklegt til að halda áfram. Þetta er starf sem fólki þykir vænt um þegar það er komið inn,“ segir Árelía.

Verst í austurhluta en best í vesturhluta

Hildur Björnsdóttir oddviti Sjálfstæðisflokksins í Reykjavík segir óboðlegt að svo langt inn í skólaárið séu enn svo mörg börn á bið.

Hún segir stöðuna misjafna eftir borgarhlutum. Samkvæmt upplýsingum frá skóla- og frístundasviði sé staðan verst í gamla Austurbæ eða Norðurmiðstöð og Austurmiðstöð, það er í Grafarvogi, Úlfarsárdal, Grafarholti, Árbæ og Grafarvogi. Staðan sé best í vesturhluta borgarinnar og Breiðholti.

„Biðlistar eru lengstir á frístundaheimilum í úthverfum borgarinnar. Þar búa foreldrar sem almennt þurfa að ferðast lengstan veg til vinnu og sitja fastir í umferðarteppum við upphaf og lok dags. Það er auðvitað enn ein flækjan í þeirra hversdag að þurfa ofan á allt að hafa áhyggjur af því að koma börnunum sínum í pössun að loknum skóladegi.“

Engin börn á bið í öðrum sveitarfélögum

Hildur segir stöðuna hafa verið sambærilega fyrir ári síðan og það lýsi því vel hversu lítil áherslan sé í borginni á þjónustu við barnafjölskyldur í Reykjavík. Til samanburðar séu engir biðlistar í frístund í öðrum nágrannasveitarfélögum Reykjavíkur. Það hafi Hildur fengið staðfest.

„Hvert einasta ár birtist þessi sami vandræðagangur á frístundaheimilunum. Svo þekkjum við auðvitað öll biðlistavanda leikskólanna. Hér þarf fólk í forystu sem setur málefni fjölskyldunnar í forgrunn, sem tryggir örugg úrræði í kjölfar fæðingarorlofs og áreiðanlega frístund að loknum skóladegi,” segir Hildur og heldur áfram:

„Við þurfum að skoða þjónustu við fjölskyldufólk í borginni heildstætt. Brotalamirnar eru allt of margar og andvaraleysið í málaflokknum hefur verið viðvarandi um alltof langt skeið. Það vantar allan metnað í þetta. Við eigum ekki að hika við að setja okkur markmið um að vera með grunnskólakerfi í fremstu röð, úrval lausna fyrir fjölskyldur að loknu fæðingarorlofi og fjölbreytt frístunda- og tómstundaúrval fyrir börn að loknum skóladegi.“