„Nýja heimsskipanin:“ Leyni­leg á­ætlun um heims­yfir­ráð í undir­búningi?

Í nýjasta þætti hlaðvarpsins Skuggavaldið leiða prófessorarnir Hulda Þórisdóttir og Eiríkur Bergmann hlustendur í gegnum sögu og einkenni hinnar frægu samsæriskenningar um Nýja heimsskipan (e. New World Order). Hlusta má á þáttinn neðst í fréttinni. 

Kenningin hvílir á þremur meginþáttum: stjórnun krísa, allsherjar eftirliti og mannfjöldastjórnun. Samkvæmt samsæriskenningunni hafa valdaelítur vísvitandi framkallað efnahagskreppur, styrjaldir og jafnvel náttúruhamfarir til að skapa ótta og óstöðugleika. Í ringulreiðinni óskar almenningur eftir sterkari stjórn, og þá stendur valdaelítan tilbúin með „lausnir“ sem þýða aukin völd þeirra. Þannig er talið að Nýja heimsskipanin nýti sér hræðslu til að tryggja sér yfirráð og traust almennings.

Illuminati og Frímúrarar

Rætur kenningarinnar liggja bæði í trúarlegum og veraldlegum hugmyndum. Trúarlega tengjast þær kristnum heimsendaspám þar sem óttast er að huldar elítur undir stjórn andkristins valds muni leika lykilhlutverk. Á hinn bóginn byggja veraldlegar kenningar um Nýju heimsskipanina á hugmyndum um valdabræður sem vinna að heimsyfirráðum – hópar eins og Frímúrarar, Illuminati og Bilderberg-klúbburinn, sem eru sagðir hafa sameinað áhrif sín til að ná alheimsstjórn.

Frímúrarar og Illuminati eru sérstaklega oft nefndir sem lykilgerendur í kenningunni. Frímúrarareglurnar, sem eru eitt elsta bræðralag heims, hafa löngum verið grunaðar um að hafa leynilega áætlun um heimsyfirráð. Þótt Illuminati hafi ekki verið virkur hópur frá árinu 1788 halda samsæriskenningasmiðir því fram að samtökin starfi enn í dag og vinni í leyni að því að móta heimsmyndina.

Eðlufólkið og fjórða ríkið

Samkvæmt kenningunni er þetta aldagamlt stríð milli ljóss og myrkurs. Samsæriskenningar af þessu tagi eiga það til að vera bæði ógnvekjandi og traustvekjandi. Þær magna upp ímyndaðan mátt hins illa en gefa jafnframt til kynna að atburðir heimsins fylgi skýrum, fyrirfram ákveðnum áætlunum. Þessar kenningar geta því dregið til sín þá sem vilja skilja flókinn heim í gegnum einfaldar skýringar.

Í þættinum kemur einnig fram hvernig slíkar kenningar geta ýtt undir tortryggni gagnvart yfirvöldum. Þó að samsæriskenningar byggist oft á misskilningi eða afvegaleiðingu, endurspegla þær stundum raunverulega óánægju almennings með valdamikil öfl.

Í þættinum er einnig kafað ofan í öfgakenndar útgáfur af kenningunni, þar sem sumir trúa því að geimverur, oft nefndar „eðlufólk,“ stjórni heiminum í gegnum þekkta stjórnmálaöfl. Aðrir sjá Nýju heimsskipanina sem nýja útgáfu af „Fjórða ríki,“ þar sem heimsyfirráð líkjast alræðisstjórn nasista.

Skuggavaldið afhjúpar í þessum fyrsta þætti af tveimur hvernig kenningar um Nýju heimsskipanina byggja á lokkandi en ógnvekjandi hugmyndum sem sannfæra fylgjendur um að alræðisríki sé í uppsiglingu.