Skil­greina Norðurvígi sem hryðju­verka­sam­tök

Í tilkynningu á vef utanríkisráðuneytis Bandaríkjanna segir að ríkið hafi sem fyrr verulegar áhyggjur af þeirri ógn sem stafi af ofbeldissamtökum drifnum af kynþáttafordómum víða um heim. 

Þá segir að ráðuneytið skilgreini samtökin Norðurvígi sem hryðjuverkasamtök, auk þriggja leiðtoga hreyfingarinnar. 

Samtökin eru stærstu nýnasistasamtök í Svíþjóð en eru einnig starfrækt í Noregi, Danmörku og hér á landi. Þau voru að auki starfrækt í Finnlandi áður en yfirvöld þar bönnuðu starfsemina árið 2020. 

„Ofbeldisfull starfsemi Norðurvígis byggja á opinberum kynþátta-, innflytjenda-, gyðinga-, og hinseginfordómum. Leiðtogar samtakanna hafa gert ofbeldisfullar árásir á pólitíska andstæðinga þeirra, mótmælendur, blaðamenn og aðra andstæðinga þeirra,“ segir í tilkynningunni. 

Að auki hafi meðlimir Norðurvígis safnað saman vopnum og sprengiefnum fyrir samtökin og staðið fyrir æfingum á ofbeldisfullum brögðum, þar á meðal hnífaslagsmálum.