Enn fúll yfir ráðningu Dags og telur að hann vinni ekki verð­laun

Dagur er fyrsti erlendi þjálfarinn sem tekur við króatíska karlalandsliðinu í handbolta og hann fékk sannkallaða draumabyrjun því liðið tryggði sig um síðustu helgi með sannfærandi hætti inn á Ólympíuleikana í París í sumar. Það vann þá Austurríki, Þýskaland og Alsír í undankeppni í Hannover.

Frammistaðan í Hannover gerði ekki annað en að auka vinsældir Dags en króatíski þjálfarinn Nenad Kljaic situr við sinn keip og telur ráðninguna alvarleg mistök.

Kljaic sagði þegar Dagur var ráðinn, um síðustu mánaðamót, að ráðning hans væri „dauðadómur“ yfir króatískum þjálfurum. Það er að segja að með því að ráða Dag hefðu forráðamenn króatíska sambandsins gert lítið úr þjálfurum þjóðarinnar.

Segir fjölmiðla gera messías úr Degi

Kljaic stendur við þessa skoðun í viðtali sem birtist í króatíska miðlinum Index á föstudaginn. Frumraun Dags í Hannover breytir engu þar um og raunar efast Kljaic stórlega um að Króatar nái góðum árangri undir stjórn Dags.

„Ég stend við það sem ég sagði. Alveg sama þó að fjölmiðlar séu að gera einhvern messías úr honum,“ segir Kljaic og telur að forráðamenn króatíska handknattleikssambandsins láti fjölmiðla hefja Dag upp til skýjanna, óverðskuldað.

„Höfum samt á hreinu að ég hef ekkert á móti Degi, en ég tel að Króatía eigi góða þjálfara sem hafa búið til alla þessa leikmenn í gegnum tíðina, og að við höfum kennt heiminum handbolta.

Hvernig eiga okkar þjálfarar núna að komast að erlendis, eftir að við fengum útlending sem landsliðsþjálfara? Öll félög munu núna segja: „Til hvers þurfum við króatískan þjálfara? Þið hafið greinilega ekkert vit á þessu fyrst þið fengið útlending til að þjálfa.“ Serbarnir gerðu þetta á undan okkur, fengu Spánverjann [Toni] Gerona og allt átti að verða æðislegt en hvað gerðist? Ekki neitt. Þremur árum síðar hafði ekkert breyst, og jafnvel versnað,“ sagði Kljaic en Serbar ráku Gerona eftir EM í janúar.

Telur Króata eiga betri þjálfara

„Allt í lagi, það er kjánalegt að bera saman Dag og Gerona. Ég hef áður sagt að Dagur er góður þjálfari, og þeir eru ekki í sama flokki. En ég tel enn að við eigum frábæra þjálfara í sama flokki, jafnvel betri, en vandamálið er að sumir henta og aðrir ekki,“ sagði Kljaic og vildi ekkert vera að gefa Degi hrós fyrir að komast á ÓL, eða viðsnúninginn hjá Króötum frá því á EM í janúar.

Ljóst er að Kljaic vildi starfið sem Dagur fékk, og hann telur sjálfan sig mun betri tryggingu fyrir verðlaunum á Ólympíuleikunum í París.

Telur að Dagur vinni ekki verðlaun í París

„Mér fannst að núna ætti ég skilið að fá að taka við landsliðinu, en ég vissi jafnframt að dyrnar væru lokaðar,“ segir Kljaic og telur forráðamenn króatíska handknattleikssambandsins standa í vegi fyrir sér.

„Tel ég að Dagur Sigurðsson vinni medalíu í París? Nei, í hreinskilni sagt þá geri ég það ekki. Ég veit mjög vel hvað hann kann og veit, og hvað hann kann ekki,“ segir Kljaic.

„Myndi ég tryggja liðinu medalíu? Ég hef sagt að ef ég myndi ekki ná medalíu þá myndi ég segja strax af mér. Ég hef mín rök fyrir því að ef ég væri með liðið þá myndi það vinna medalíu. Kannski afsannar Dagur það sem ég hef sagt hérna, hver veit, en í París bíða mun sterkari lið og þá kemur í ljós hve mikið hann veit og getur,“ segir Kljaic.

„Það verður nægur tími til undirbúnings fyrir Ólympíuleikana. Ég er ekki hrifinn af ósamræminu í fjölmiðlum. Fyrir leikina í Hannover var sagt ómögulegt fyrir Dag að breyta einhverju á tveimur dögum, en svo var talað um hann eins og kraftaverkamann. Það mun allt skýrast í París og þá kemur í ljós hversu góður þjálfari hann er,“ segir Kljaic.