Fólk sæki bætur sjálft til að sleppa við „blóðuga“ þóknun

„Við erum alltaf að reyna að benda fólki á hvað það er ótrúlega auðvelt að gera þetta sjálfur,“ segir Brynhildur Pétursdóttir, framkvæmdastjóri Neytendasamtakanna.

„Þetta er bara svo blóðugt, tala nú ekki um þetta mál en einnig mál sem við höfum fengið á okkar borð,“ segir Brynhildur og vísar þar í mál ungs pars sem sótti um bætur í gegnum síðu Flugbóta.is og endaði fyrir dómstólum. 

„Það sem þú gerist þegar þú ferð í leitarvél þá er þetta það fyrsta sem dúkkar upp,“ segir Brynhildur um síðu Flugbóta.is sem birtist efst þegar fólk slær inn „flugbætur“ á Google og birtist í þriðja sæti þegar fólk slær inn „bætur vegna seinkunar á flugi“.

„Það er fullt af fólki sem áttar sig ekki á þessu. Það heldur að þetta sé leiðin til að fá bætur en flugfélögum er skylt að vera með eyðublöð vegna þessa. Ef neytendur lenda í vandræðum geta þeir fengið aðstoð hjá okkur eða evrópsku neytendaaðstoðinni (ECC) sem aðstoða ókeypis ef þetta er yfir landamæri,“ segir hún.

„Ef þetta er erlent flugfélag og þú lendir í vandræðum þá aðstoðar evrópska neytendaaðstoðin án nokkurs endurgjalds,“ segir Brynhildur.

Jafnmikil vinna að fylla út eyðublað og senda gögn á lögmann

Brynhildur segir að það séu nokkur fyrirtæki sem auglýsi aðstoð við að sækja flugbætur til flugfélaga. „Þetta er alltaf þóknun upp á að minnsta kosti tuttugu prósent auk virðisaukaskatts og þeim hefur gengið furðuvel að koma sér inn á þennan markað,“ segir hún.

Þið viljið hvetja fólk til að gera þetta sjálft?

„Já, af því lögmaðurinn gerir það ekki. Það er allajafna jafn mikil vinna fyrir þig að senda honum flugnúmer, kennitölu og gefa honum umboð eins og að finna eyðublaðið og setja inn flugnúmer, kennitölu og aðrar upplýsingar,“ segir Brynhildur.

Hún segir að það sé alltof algengt að fólk haldi að síður flugbótafyrirtækja séu opinbera leiðin eða jafnvel eina leiðin til að sækja bætur frá flugfélögum. 

„Inni á síðunni okkar þá er sniðugur flugreiknir og þar geturðu séð hvort þú eigir yfirhöfuð rétt á bótum og þá hversu háum. Kannski var seinkunin ekki nógu mikil og þú átt ekki rétt á skaðabótum,“ segir Brynhildur.

„Ef fólk vill kaupa sér þjónustu þá gerir það það en við erum bara að benda á að þarna getur fólk sparað sér aurinn,“ segir Brynhildur að lokum.