Upp­ljóstrari FBI á­kærður fyrir lygar um Hunter og Joe Biden

Hunter Biden sat um tíma í stjórn úkraínska fyrirtækisins Burisma en Smirnov er sakaður um að hafa logið því í júní 2020 að yfirmenn í fyrirtækinu hefðu greitt bæði Hunter og Joe fimm milljónir dala á árunum 2015 og 2016. Smirnov hélt því fram að yfirmaður hefði sagt sér að þeir hefðu ráðið Hunter svo hann gæti varið þá með aðstoð föður síns.

Þetta segja saksóknarar á vegum David Weiss, sérstaks rannsakanda dómsmálaráðuneytis Bandaríkjanna, að sé lygi. Smirnov er sagður hafa skáldað þessar ásakanir því honum hafi verið illa við Joe Biden, samkvæmt frétt AP fréttaveitunnar.

Áhugasamir geta séð ákæruna hér á vef dómsmálaráðuneytis Bandaríkjanna. 

Smirnov var ákærður eftir rannsókn svokallaðs Grand jury, en það er sérstakt fyrirbæri vestanhafs þar sem kviðdómendur eru fengnir til að fara yfir vitnisburð og gögn í ákveðnum málum og kanna hvort þeim þyki tilefni til ákæru.

Hann var handtekinn í Las Vegas í gær.

Hafa stuðst við ásakanir Smirnovs

Repúblikanar hafa varið mörgum mánuðum og jafnvel árum í að rannsaka Hunter og Joe Biden. Þeir hafa ítrekað haldið því fram að Joe Biden hafi hagnast á viðskiptum Hunters á erlendri grundu og tekið við mútum gegnum fjölskyldumeðlimi sína.

Þingmenn Repúblikanaflokksins hafa þó ekki getað fært sannanir fyrir ásökunum þeirra og hafa þeir gert tilraunir til óheiðarlegrar framsetningar á meintum vísbendingum þeirra.

Weiss hefur ákært Hunter Biden fyrir skattsvik og fyrir að hafa logið á eyðublaðið vegna byssukaupa, þar sem hann hakaði við að hann væri ekki í neyslu, sem var ekki rétt.

Repúblikanar börðust gegn yfirmönnum FBI um að birta minnisblöð um hvað Smirnov sagði starfsmönnum stofnunarinnar. Forsvarsmenn FBI vildu ekki birta þau en þingmenn Repúblikanaflokksins gerðu það og hafa ítrekað lýst honum sem „trúverðugu“ vitni og flaggað ásökunum hans við rannsókn þeirra.

Kevin McCarthy, fyrrverandi forseti fulltrúadeildarinnar, sagði til að mynda þegar hann staðfesti að Repúblikanar ætluðu að hefja formlega rannsókn á Joe Biden, í aðdraganda mögulegrar ákærur fyrir embættisbrot, að „trúverðugt vitni FBI“ hefði sakað Biden-feðgana um að þiggja mútur.

Hluti þeirra minnisblaða sem Repúblikanar birtu eru nú sönnunargögn í málinu gegn Smirnov.

Sjá einnig: Sagður hafa eytt fúlgum fjár í vændis­konur og lúxuslíf

Í yfirlýsingu til CNN segir lögmaður Hunters Biden að hann og aðrir hafi um mánaðaskeið varað við því að Repúblikanar hefðu byggt samsæriskenningar sínar um Hunter og fjölskyldu hans á lygum. Það hafi reynst rétt.

Hann segir Repúblikana hafa ítrekað notast við lygar og ósannindi frá ótrúverðugu fólki við rannsókn þeirra.

Deila um rannsóknina

Leiðtogar rannsóknarinnar á Biden halda því fram að rannsóknin byggi ekki á ásökunum Smirnovs. James Comer, formaður eftirlitsnefndar fulltrúadeildarinnar, sagði í yfirlýsingu í gær rannsókn Repúblikana byggði ekki á ásökunum Smirnovs. Hún byggði á umfangsmiklum vísbendingum eins og bankagögnum og vitnisburði.

Þetta sýni að Joe Biden hafi vitað af og tekið þátt í viðskiptum fjölskyldumeðlima sinna.

Jamie Raskin, æðsti Demókratinn í eftirlitsnefndinni, lýsti því yfir í gær að Repúblikanar ættu að hætta rannsókn þeirra á Joe Biden. Ljóst sé að lykilvísbendingar þeirra hafi byggt á lygum.

„Það er óneitanleg staðreynd að ásakanir Repúblikana gegn Biden hafa ávallt byggt á lygum og samsæriskenningum,“ sagði Raskin í yfirlýsingu. Hann kallaði eftir því að Mike Johnson, forseti fulltrúadeildarinnar, og aðrir Repúblikanar hættu að dreifa þessum lygum og hættu þessari rannsókn þeirra.

Saksóknarinn umdeildi

Eins og fram hefur komið hefur rannsókn Repúblikana að miklu leyti snúist um störf Hunters Biden í stjórn Burisma. Hafa þeir sakað Joe Biden um að hafa þrýst á yfirvöld í Úkraínu, þegar hann var varaforseti Barack Obama, um að saksóknari sem á að hafa verið að rannsaka Burisma vegna spillingar, yrði rekinn.

Það er rétt að Biden krafðist þess af yfirvöldum Úkraínu að ríkissaksóknarinn Viktor Shokin yrði rekinn og að hann hótaði því að dregið yrði úr fjárstuðningi við Úkraínu ef Shokin yrði ekki rekinn. Biden hafði farið til Úkraínu í desember 2015 og í ræðu á þingi landsins kallaði hann eftir brottrekstri Shokin.

Biden stærði sig einnig opinberlega af því, nokkrum árum síðar, að hafa fengið ráðamenn í Úkraínu til að reka Shokin.

Það var þó vegna þess að hann þótti ekki berjast nægilega vel gegn spillingu í Úkraínu. Bakhjarlar Úkraínu í Bandaríkjunum, Evrópu og Alþjóðagjaldeyrissjóðnum, svo einhverjir séu nefndir, kölluðu allir eftir því að Shokin yrði rekinn. Meira að segja Repúblikanar studdu viðleitni Biden á sínum tíma.

Nokkrir öldungadeildarþingmenn Repúblikanaflokksins skrifuðu undir bréf sem sent var Petro Poroshenko, þáverandi forseta Úkraínu, árið 2016. Í því bréfi kölluðu þeir eftir „endurbótum“ á embætti ríkissaksóknara Úkraínu. Bréf þetta, sem finna má hér á vef bandaríska þingsins, var sent í febrúar 2016, skömmu áður en þingmenn í Úkraínu kusu að víkja ríkissaksóknaranum úr embætti.

Rob Portman, einn þingmannanna, birti meðfylgjandi tíst árið 2016 þar sem hann sagði Bandaríkin standa með Úkraínumönnum í baráttunni gegn spillingu.

Þetta var á sama tíma og Biden, sem var þá varaforseti Bandaríkjanna, þrýsti á stjórnvöld í Úkraínu um að koma saksóknaranum úr embætti, vegna þess að hann þótti ekki berjast gegn spillingu af nægilega miklum krafti og var jafnvel sjálfur sakaður um spillingu.

Sjá einnig: Repúblikanar vildu einnig láta reka saksóknarann úkraínska

Ríkisstjórnir nokkurra ríkja og forsvarsmenn stofnanna sem aðstoðuðu Úkraínu á þessum tíma með fjárveitingum og öðrum hætti vildu Shokin burt.