Guðmundur tilkynnti um stafslok sín í pósti til starfsmanna fjármála- og efnahagsráðuneytisins fyrr í dag, samkvæmt upplýsingum Innherja, en hann hefur stýrt ráðuneytinu allt frá því sumarið 2009. Þórdís Kolbrún R. Gylfadóttir tók sem kunnugt er við sem fjármálaráðherra í október samhliða því að Bjarni Benediktsson færði sig yfir í utanríkisráðuneytið.
Í krafti þess að hafa verið ráðuneytisstjóri í fjármálaráðuneytinu um langt skeið hefur Guðmundur á sama tíma verið einn áhrifamesti embættismaðurinn í íslensku stjórnkerfi. Hann hefur jafnframt meðal annars áður setið í stjórnum LSR og Söfnunarsjóði lífeyrissréttinda auk þess að hafa verið í stjórn Þjóðarsjóðs Ómanríkis frá árslokum 2020.
Fram kemur í pósti Guðmundar til starfsmanna ráðuneytisins að hann hafi tekið við skipun sem sendiherra í utanríkisþjónustunni. Gert sé ráð fyrir því að hann muni taka til starfa í Róm á Ítalíu seinna á næsta ári.
Ísland starfrækir ekki sérstakt sendiráð á Ítalíu heldur er það sendiráðið í París sem gætir hagsmuna Íslands gagnvart Ítalíu. Utanríkisþjónustan heldur hins vegar úti sendiskrifstofu í Róm þar sem fastanefnd Íslands hjá Sameinuðu þjóðunum gætir hagsmuna landsins í samstarfi við þrjár stofnanir: Matvæla- og landbúnaðarstofnun SÞ (FAO), Matvælaáætlun SÞ (WFP) og Alþjóðaþróunarsjóð landbúnaðarins (IFAD).
Guðmundur, sem er með háskólapróf í stjórnmálafræði og alþjóðastjórnmálum, var um árabil ráðuneytisstjóri í menntamálaráðuneytinu áður en hann fór yfir í fjármálaráðuneytið. Þar áður hafði hann verið deildarstjóri og síðar skrifstofustjóri í forsætisráðuneytinu.
Fyrr í þessum mánuði var Tómas Brynjólfsson gerður að vararáðuneytistjóra í fjármálaráðuneytinu en hann hefur undanfarin ár verið skrifstofustjóri yfir skrifstofu efnahagsmála í ráðuneytinu.
