Öryggis­ráðið greiðir at­kvæði um vopnahléstillögu

Samkvæmt drögum að tillögunni, sem koma frá Sameinuðu arabísku furstadæmunum, er einnig kallað eftir tveggja ríkja lausn á svæðinu og áhersla lögð á sameiningu Gasa og Vesturbakkans.

Í drögunum er ekki fjallað um Hamas en allar árásir á almenna borgara fordæmdar og kallað eftir lausn allra gísla. 

Viðræður um drögin stóðu yfir í allan gærdag en Bandaríkjamenn hafa áður beitt neitunarvaldi sínu vegna áþekkra tillaga. 

Stjórnvöld vestanhafs hafa hingað til lýst yfir afdráttarlausum stuðningi við Ísrael en Joe Biden Bandaríkjaforseti varaði við því á dögunum að alþjóðlegur stuðningur færi þverrandi vegna mannfalls meðal almennra borgara á Gasa.

Reuters greindi frá því í gær að bæði Ísraelsmenn og Hamas væru opin fyrir tímabundnu vopnahléi gegn lausn gísla en ágreiningur væri uppi um framkvæmdina.