Varð fyrir ælu á Bagga­lút

Baggalútur hefur árum saman fyllt Háskólabíó með jólatónleikum sínum sem fjölmargir sækja á hverju ári. Borið hefur á ölvun á tónleikunum enda mikið stuð á fólki. Flestir hafa þó komist heim í hreinum fötum.

Erlendur S. Þorsteinsson var meðal gesta í Háskólabíó í gærkvöldi og lenti í þeirri miður skemmtilegu lífsreynslu að kastað var upp á hann. Erlendur sem er reiknifræðingur, reiknaði það út að konan ætti við drykkjuvandamál að stríða, enda kastaði hún upp á bak Erlends fyrir hlé. Hann upplýsir að konan hafi verið fjarlægð úr tónleikasalnum.

Meðal annarra gesta í salnum voru Hreggviður Jónsson fjárfestir og stór eigandi í Veritas ásamt samstarfsfélögum. Nú þegar Vítalíumálið er að baki er tilefni til að sletta aðeins úr klaufunum og fagna jólunum.

En það var víðar djammað í gærkvöldi. Útvarpsmaðurinn og TikTok-stjarnan Gústi B hélt tryllt afmælisteiti í kartöfluskúrunum í Ártúnsbrekkunni. Fallegi strákurinn Patrik Atlason tryllti lýðinn sem var í flestum tilfellum rétt yfir tvítugt ef frá er talinn fyrrnefndur Patrik og útvarpskonurnar Þórdís Valsdóttir og Ósk Gunnarsdóttir. Af myndböndum að dæma gáfu þær yngra fólkinu ekkert eftir.

Davíð Másson fjárfestir skellti sér út að borða á veitingastaðinn Nebraska í gær. Með í för voru meðal annars hjónin Anna Sigríður Arnarsdóttir hjá Spildu og Pétur Blöndal fjölmiðlamaður. Davíð er sérstaklega brúnn og sætur þessa dagana eftir ferðalög erlendis þar sem hann naut lífsins meðal annars í Namibíu og á fallegri eyju í Venesúela með sinni heittelskuðu Lilju Einars.

En svo eru það þeir sem nýttu föstudaginn til að rækta líkama og sál. Leikaraparið Vala Kristín Eiríksdóttir og Hilmir Snær Guðnason hnykkluðu vöðvana í Laugum og fóru yfir málin með Benedikt Erlingssyni leikara. Hilmir steig svo á svið í Borgarleikhúsinu í gærkvöldi í leikritinu Mátulegir, örugglega vel gíraður eftir góða rækt.

Og svo eru það þau sem ákváðu að skilja við hasarinn á aðventunni og halda á hlýrri og spennandi slóðir. Leikarahjónin Gísli Örn Garðarsson og Nína Dögg Filippusdóttir eru mætt til Brasilíu þar sem Jesústyttan fræga í Ríó tók á móti þeim. Gísli Örn hefur meðal annars hitt óvæntan aðdáanda hans úr Ragnarökum auk þess sem þau skelltu sér á fótboltaleik í mekka fótboltans.

Rakaði Dagur á sér bringuna?

Síðast en ekki síst ber að nefna tryllt starfsmannapartý í ráðhúsi Reykjavíkur og í húsakynnum Ríkisútvarpsins í Efstaleiti. Íþróttafréttamenn héldu jólaspurningakeppni og þá kepptu starfsmenn sín á milli í því hver ætti bestu jólaskreytinguna.

Hápunktur kvöldsins í ráðhúsinu var svo líklega þegar Dagur B. Eggertsson, borgarstjóri, sem á rétt rúman mánuð eftir í starfi, mætti sem Skíða-Ken í ráðhúsið. Það var vel við hæfi, enda Barbie þema. Sérstaka athygli vekur bringan á Degi en svo virðist vera sem borgarstjórinn hafi rakað hana í tilefni kvöldsins.