Vilja seðlabankastjóra burt og neyðarlög um lækkun vaxta

Heimir Már Pétursson skrifar 6. nóvember 2023 12:13

Ásthildur Lóa Þórsdóttir þingmaður Flokks fólksins og Ragnar Þór Ingólfsson formaður VR birtu grein í morgun þar sem þau tíunda meint mistök Ásgeirs Jónssonar seðlabankastjóra í embætti. Samsett

Þingmaður Flokks fólksins og formaður VR krefjast þess að seðlabankastjóra verði vikið úr embætti fyrir meint mistök í vaxtamálum sem hafi aukið byrðar heimilanna í landinu. Þá verði stjórnvöld nú þegar að setja neyðarlög sem keyri vextina niður svo heimilin verði ekki ein látin bera ábyrgð á því að koma verðbólgunni niður.

Ásthildur Lóa Þórsdóttir þingmaður Flokks fólksins og Ragnar Þór Ingólfsson formaður VR birtu ítarlega grein á Vísi í morgun þar sem þau tíunda meint mistök Ásgeirs Jónssonar seðlabankastjóra í embætti. Hvorki seðlabankastjóri né Seðlabankinn njóti lengur trausts þjóðarinnar. Seðlabankastjóri beri ábyrgð á miklum og vanhugsuðum vaxtalækkunum eftir að kórónuveirufaraldurinn skall á og síðan gífurlegum vaxtahækkunum sem eigi sér ekki hiðstæðu í öðrum löndum.

„Okkur finnst hann algerlega rúinn trausti, svo ekki sé dýpra í árina tekið. Það hvernig Seðlabanki Íslands hefur í raun farið gegn heimilum landsins á harðari og óbilgjarnari hátt en nokkur Seðlabanki nokkurs staðar í heiminum gengur ekki upp,“ segir Ásthildur Lóa.

Ásgeir Jónsson var skipaður seðlabankastjóri til fimm ára og rennur skipunartími hans út í ágúst á næsta ári. Ásthildur Lóa og Ragnar Þór segja í grein sinni að því þurfi Katrín Jakobsdóttir forsætisráðherra að auglýsa stöðuna í febrúar, annars framlengist skipun Ásgeirs um önnur fimm ár.

Seðlabankastjóri hefur marg ítrekað að aðgerðir bankans byggi á lögum um hann þar sem bankanum væri falið það hlutverk að stuðla að því að verðbólga væri í kringum 2,5 prósenta verðbólgumarkmið. Ásthildur Lóa telur Seðlabankann ekki hafa gert það.

„Fyrst klúðra þeir málum alveg svakalega með því að búa til ástand á húsnæðismarkaði með því að fara í vaxtalækkanir án þess að koma með nokkra einustu mótvægisaðgerð við þær. Og núna sitjum við allt í einu uppi með eitthvað sem er þeirra klúður að stóru leyti,“ segir þingmaðurinn. Orsakir verðbólgunnar megi ekki rekja til heimilanna í landinu heldur til annarra þátta.

Þá bitni verðbólgan helst á þeim fjórðungi lántakenda sem væru með óverðtryggð lán. Bankinn væri að búa til kreppu sem taki mörg ár að ganga yfir. Auk þess að skipta seðlabanakstjóra út verði stjórnvöld að grípa til aðgerða fyrir heimilin.

„Við krefjumst þess einnig að sett verði neyðarlög til verndar heimilunum. Vextir verði lækkaðir hratt niður í að minnsta kosti fjögur prósent og bremsa eða þak sett á leiguverð.“

Þannig að vaxtabreytingum verði handstýrt?

„Já, það verður bara að vera þannig. Ég meina, er ekki verið að handstýra þeim hvort eð er? Er Seðlabankinn ekki að handstýra vaxtabreytingum,“ segir Ásthildur Lóa Þórsdóttir.

Seðlabankinn Verðlag Íslenskir bankar Flokkur fólksins

Tengdar fréttir

Við krefjumst uppsagnar Seðlabankastjóra!

Það sem við rekjum hér á eftir ætti að vekja alvarlegar spurningar um hæfi æðstu stjórnenda Seðlabankans og við teljum ljóst að hvorki Seðlabankinn né Seðlabankastjóri sjálfur, njóti trausts þjóðarinnar lengur.

6. nóvember 2023 08:31

Stýrivaxtahækkanir farnar að bera árangur

Verðbólga hjaðnar um 0,1 prósentustig milli mánaða og stendur nú í 7,9 prósentum. Hagfræðingur hjá Landsbankanum segir mælinguna ekki koma á óvart og að ljóst sé að stýrivaxtahækkanir Seðlabankans séu farnar að bera árangur.

30. október 2023 11:40

Ein stærsta millifærsla í áratugi á sér stað úr vasa sparifjáreigenda til skuldara

Ein stærsta millifærsla í áratugi hefur nú átt sér stað úr vasa sparifjáreigenda til skuldara í gegnum neikvæða raunvexti. Verulega miklar fjárhæðir hafa verið færðir til. Það gengur ekki til lengdar að sparifjáreigendur standi undir þessu. Verðbólguskellurinn hefur því ekki fallið á heimilin í sama mæli og ef þau væru flest með verðtryggð lán, sagði seðlabankastjóri.

26. október 2023 14:24

Segir Seðlabankann halda húsnæðismarkaðnum niðri

Sigurður Hannesson, framkvæmdastjóri Samtaka iðnaðarins, er ómyrkur í máli hvað varðar uppbyggingu húsnæðis sem hann segir alltof alltof litla.

23. október 2023 11:33

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.