Barentsráðið var stofnað árið 1993 og samanstendur af Íslandi, Danmörku, Finnlandi, Noregi, Svíþjóð og Rússlandi. Framkvæmdastjórn Evrópusambandsins hefur einnig átt sæti í Barentsráðinu. Ráðið var stofnað til að auka samvinnu ríkja sem liggja að Barentshafinu.
Í yfirlýsingu á vef utanríkisráðuneytis Rússlands segir að ráðið hafi reynst vel í gegnum árin og í gegnum það hafi friður og stöðugleiki á svæðinu verið tryggður. Önnur ríki í því hafi gert ráðið óstarfhæft frá mars 2022. Í febrúar 2022 réðust Rússar inn í Úkraínu.
Finnar hafa farið með forsæti Barentsráðsins og áttu Rússar að taka við því. Í yfirlýsingu Rússa segir að Finnar hafi ekki virst tilbúnir til þess og því hafi verið ákveðið að Rússar segðu sig úr ráðinu.
Í yfirlýsingu utanríkisráðuneytisins segir að yfirvöld Rússlands séu sannfærð um að „hið núverandi pólitíska ástand“ sem stýri aðgerðum nágranna Rússlands á norðurhveli sé ekki í samræmi við langtímahagsmuni svæðisins. Er ábyrgð á því að Barentsráðið sé ekki lengur starfhæft lögð að fótum „félaga“ Rússlands í ráðinu.
