Nachevski dæmdur í tveggja ára bann: Féll fyrir tál­beitunni

Um þetta úr­skurðaði dóm­stóll Evrópska hand­knatt­leiks­sam­bandsins en um er að ræða einn anga máls sem skaut upp kollinum í kjöl­farið á rann­sóknar­vinnu TV 2.

Í heimildar­mynd TV2, sem bar nafnið Grun­sam­legur leikur, sást Nachevski ræða við það sem hann heldur að sé kín­verski kaup­sýslu­maðurinn Herra Z­hang um hag­ræðingu úr­slita. Það var í raun leikari sem TV 2 réði til að grípa Nachevski glóð­volgan.

Úr­skurður EHF snýr ein­mitt að þessum anga málsins því þó að Nachievski hafi hafnað boði "kín­verska kaup­sýslu­mannsins", þá bar honum skylda til þess að til­kynna þessa beiðni, sem hann gerði ekki.

Þá er ekki loku fyrir það skotið að Nachievski muni fá lengra bann í kjöl­farið eftir því sem fleiri angar málsins verða teknir fyrir.

Alþjóða handknattleikssambandið, IHF, hafði áður ákveðið að fylgja for­dæmi evrópska hand­knatt­leiks­sam­bandsins, EHF, og úti­loka Norður-Makedóníu­manninn Dragan Nachevski frá störfum við stór­mót á meðan rann­sókn á störfum hans sem formanns dómara­nefndar EHF stendur yfir.

Hann var um árabil formaður dómaranefndar EHF, en evrópska sambandið setti Nachevski til hliðar í maí á þessu ári vegna uppljóstrana TV2.