Líður vel á áttunda degi hungur­verk­falls

Hvalveiðiskipin Hvalur 8 og Hvalur 9 lönduðu þremur langreyðum í Hvalfirði í morgun. Hvalirnir þrír eru fyrstu stórhvelin sem veidd eru á þessu tímabili, sem hófst 1. september síðastliðinn.

„Þar sem við höfum verið á Íslandi í þeirri von um að hvalveiðum yrði hætt hefur verið mjög erfitt að sjá þrjá hvali dregna upp dráttarbrautina,“ segir Norðmaðurinn Samuel Rostøl norskur náttúruverndarsinni sem er hér á landi á vegum Captain Paul Watson Foundation. 

Kvalafullar síðustu mínútur

Á myndum sem Samuel og kollegar hans tóku í morgun mátti sjá minnst tvo hvalveiðiskutla í fyrsta hvalnum sem dreginn var á land. Í reglugerð Svandísar Svavarsdóttur matvælaráðherra sem tók gildi 1. september segir að við veiðar skuli ávallt stefnt að því að dýr aflífist samstundis. Samuel segir þetta skýrt mark um að þeim skilyrðum sé ekki hægt að fylgja.

„Við gátum séð að það voru margar kvalafullar mínútur hjá þessu vesalings dýri,“ segir Samuel.

„Það kemur mér í raun ekkert á óvart. Þrátt fyrir eftirlitsmennina í fyrra sáum við að þeir brutu dýraverndarlögin æ ofan í æ. Ég held að hvalveiðifyrirtækið beri enga virðingu fyrir lögunum. Ég held að þeir búist við að geta komið sér hjá lögunum og skjótist í gegn og fái leyfi fyrir næsta tímabil.“

Samuel hefur verið í hungurverkfalli frá því að Svandís kynnti ákvörðun sína um áframhald hvalveiða. Hann segir að sér líði vel, þrátt fyrir allt. 

„Þetta fer svolítið upp og niður. Stundum hef ég verið alveg uppgefinn og verð fljótt þreyttur. Ég var hræddur um að dagurinn í dag, langur úti í kaldri rigningunni, yrði erfiður en mér líður vel,“ segir hann.

Hundruð kvikmyndagerðarmenn krefjast banns

Náttúruverndarsamtök Íslands hafa nú krafist þess við Matvælastofnun að hún stöðvi hvalveiðarnar tafarlaust vegna meintra brota á reglugerð sem framin hafi verið í fyrsta veiðitúr þessa tímabils. SAmkvæmt upplýsingum frá MAST þarf hvalur að skila inn atvikaskýrslum innan tveggja virkra daga, sem verða skoðaðar af sérfræðingum MAST.

Íslenskt kvikmyndagerðarfólk sendi þá ákall til Liliju Alfreðsdóttur vinnumálaráðherra og Svandísar Svavarsdóttur matvælaráðherra síðdegis um stöðvun veiðanna. Auk þeirra hafa hátt í hundrað kvikmyndagerðarmenn í Hollywood enn og aftur sent stjórnvöldum ákall um stöðvun veiðanna.

Kristján Loftsson eigandi hvals hefur ekki svarað fyrirspurnum fréttastofu í dag þrátt fyrir ítrekaðar tilraunir.