Segja neytendur blekkta með fagurgala um áhrif omega-3 fæðubótarefna

Hólmfríður Gísladóttir skrifar 24. ágúst 2023 10:38

Íslendingar hafa löngum byrjað daginn á því að taka lýsi. En hefur það tilætluð áhrif á líkamann? Getty

Ný rannsókn bendir til þess að framleiðendur fæðubótarefna sem innihalda fiskiolíu séu ófeimnir við að markaðsetja hana sem góða fyrir hjarta- og æðakerfið, jafnvel þótt rannsóknir hafi sýnt fram á að áhrif þeirra séu lítil eða engin.

Samkvæmt frétt Washington Post um málið hafa rannsóknir sýnt fram á að neysla sjávarfangs sé góð fyrir hjartað og að þeir sem neyta sjávarfangs reglulega séu minna líklegir til að deyja af völdum hjartasjúkdóma.

Ávinningin má meðal annars rekja til omega-3 fitusýra en neysla þeirra í pilluformi virðist ekki skila sama árangri og að fá þær beint úr matvælum.

Niðurstöður nýju rannsóknarinnar voru birtar í JAMA Cardiology í gær en rannsóknin náði til yfir 2.000 fæðubótarefna sem innihalda fiskolíu. Í um 80 prósent tilvika reyndust vörurnar auglýstar með texta um góð áhrif omega-3 á líkamann og í um 60 prósent tilvika var fjallað um góð áhrif á hjarta- og æðakerfið.

Ann Marie Navar, hjartasérfræðingur við University of Texas Southwestern Medical Center og einn af skýrsluhöfundunum, segir hið almenna orðalag blekkja neytendur til að halda að fæðubótarefnin leiði til ávinnings fyrir heilann og hjartað.

Sérfræðingar segja rannsóknir, þar af tvær nýlegar, ekki benda til þess að svo sé.

Navar segir að hún og kollegar hennar hafi ákveðið að ráðast í rannsóknina á fæðubótarefnunum eftir að hafa ítrekað heyrt sjúklinga sína tala um að þeir væru að taka þau fyrir hjartað. Það kæmi þeim alltaf á óvart þegar hún upplýsti þá um að líklega hefðu efnin engin áhrif.

„Það kemur mér ekki á óvart að sjúklingar mínir haldi að fiskiolía sé að hjálpa þeim,“ segir hún eftir að hafa rannsakað það hvernig vörurnar eru merktar og auglýstar.

Samkvæmt umfjöllun Washington Post hafa niðurstöður rannsókna ekki allar verið á einn veg hvað varðar mögulegan ávinning af inntöku fiskiolíu en nýjar rannsóknir, sem náðu til samtals 45.000 einstaklinga, virðast benda til þess að hann sé takmarkaður.

Luke Laffin, sérfræðingur í forvörnum hjartasjúkdóma hjá Cleveland Clinic, segir niðurstöðurnar áhyggjuefni, það er að segja að verið sé að ýja að því við neytendur að fæðubótarefnin muni hjálpa þeim að þróa með sér hjartasjúkdóma.

„Ef við héldum að þau hefðu góð áhrif þá værum við að ávísa þeim,“ segir hann.

Laffin segist hvetja sjúklinga sína til að fá omega-3 með því að neyta sjávarfangs og annarra matvæla.

Lyf Matvælaframleiðsla Heilbrigðismál Neytendur Heilsa

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.