KA Íslandsmeistari í blaki í sjöunda sinn

Norðanmenn höfðu 2-1 forystu fyrir leik kvöldsins og því var ljóst að liðið gat tryggt sér titilinn á heimavelli í kvöld. KA tók forystu í leiknum með því að sigra fyrstu hrinuna 25-20, og liðið gerði slíkt hið sama í næstu hrinu og staðan því orðin 2-0.

Hamarsmenn gáfust þó ekki upp og unnu sannfærandi sigur í þriðju hrinu, 25-16, en KA-menn höfðu betur í fjórðu hrinunni 25-21 og Íslandsmeistaratitillinn í höfn.

Eins og áður segir var þetta sjöundi Íslandsmeistaratitill KA og sá fyrsti síðan 2019. Hamarsmenn höfðu unnið Íslandsmeistaratitilinn síðustu tvö ár, en þurftu að gera sér silfrið að góðu að þessu sinni.