Erlent

Öryggisvörður sem njósnaði fyrir Rússa leiddur í gildru

Samúel Karl Ólason skrifar
David Ballantyne Smith njósnaði fyrir Rússa frá 2020 til 2021, svo vitað sé. Dómari sagðist sannfærður um að njósnirnar hefðu byrjað árið 2018.
David Ballantyne Smith njósnaði fyrir Rússa frá 2020 til 2021, svo vitað sé. Dómari sagðist sannfærður um að njósnirnar hefðu byrjað árið 2018. AP/Lögreglan í Lundúnum

Breskur öryggisvörður í sendiráði Breta í Berlín hefur verið dæmdur í rúmlega þrettán ára fangelsi fyrir að njósna fyrir Rússa. David Ballantyne Smith er 58 ára gamall en sagðist ekki hafa ætlað að valda skaða.

Smith sagði fyrir dómi að hann hefði verið þunglyndur, einmana og verið að drekka mikið þegar hann ákvað að leka leyndarmálum til Rússa með því markmiði að valda yfirvöldum Bretlands skömm.

David Ballantyne Smith er 58 ára gamall.Lögreglan í Lundúnum

Dómarinn gaf þó ekki mikið fyrir þá afsökun, samkvæmt frétt Sky News. Hann sagði öryggisvörðinn hafa safnað mikið af leyndarmálum til að koma þeim til óvinveitts ríkis og valda Bretlandi skaða.

„Þitt starf var að tryggja öryggi sendiráðsins og starfsfólksins þar,“ sagði dómarinn. Hann sagði einnig að Smith hefði fengið greitt fyrir njósnir sínar, sem fólust meðal annars í því að útvega Rússum nöfn, myndir og upplýsingar um starfsmenn sendiráðsins.

Smith tók einnig myndir og skjöl af skrifborðum og úr skúffum og útvegaði Rússum einnig myndband sem hann tók upp er hann gekk um ganga sendiráðsins og myndaði inn á skrifstofur.

Smith er einnig sagður hafa gefið Rússum leynileg skjöl sem innihéldu meðal annars skilaboð til Boris Johnson, sem þá var forsætisráðherra Bretlands.

Njósnarinn hafði verið undir eftirliti um nokkuð skeið áður en hann var handtekinn. Samkvæmt yfirlýsingunni frá lögreglunni í Lundúnum komst upp um hann þegar hann sendi bréf til starfsmanns sendiráðs Rússlands en það bréf innihélt leynileg skjöl og upplýsingar um starfsmenn breska sendiráðsins.

Rannsóknin hófst í lok árs 2020 og var meðal annars fylgst með Smith með földum myndavélum.

Til að góma hann lögðu rannsakendur fyrir hann gildru í ágúst 2021. Breskur útsendari þóttist vera rússneskur embættismaður og fór í sendiráðið. Þar sá hann til þess að Smith heyrði sig bjóðast til þess að útvega Bretum leynilegar upplýsingar frá Rússlandi.

Hér má sjá Smith taka myndband af öryggismyndavélaskjám í breska sendiráðinu í Berlín. Þarna var hann að skoða myndir af breskum útsendara sem hann hélt að væri Rússi sem ætlaði að njósna fyrir Breta.AP/Lögreglan í Lundúnum

Smith sagði Rússum frá því og var honum skipað að taka afrit af þessum meintu leynilegu upplýsingum, sem hann og gerði. Var hann í kjölfarið handtekinn fyrir njósnir.

Hann var einungis sakfelldur fyrir að njósnir frá 2020 til 2021 en dómarinn sagðist sannfærður um að Smith hefði byrjað að njósna fyrir Rússa árið 2018 og byggði hann þá skoðun sína á gögnum málsins.

Hér að neðan má sjá yfirlýsingu saksóknara um dóminn í dag.

Bretland Rússland

Tengdar fréttir

Annar Þjóðverji handtekinn vegna njósna fyrir Rússa

Lögreglan í Þýskalandi handtók á sunnudaginn annan mann vegna umfangsmikils og vandræðalegs njósnamáls. Í desember var starfsmaður BND, leyniþjónustu Þýskalands, handtekinn og er sá grunaður um að hafa njósnað fyrir Rússa.

Vann fyrir rússneskan auðjöfur sem hann átti að rannsaka

Saksóknarar ákærðu í gær mann sem var einn af æðstu starfsmönnum Alríkislögreglu Bandaríkjanna í New York. Charles McGonigal er sakaður um að hafa unnið fyrir rússneskan auðjöfur sem hann var með til rannsóknar.

Falsa ásakanir gegn eigin njósnara

Þegar 36 ára gamall maður undir nafninu Victor Muller Ferreira lenti á flugvelli í Sao Paulo í apríl var hann fljótt handtekinn. Yfirvöld í Brasilíu höfðu verið vöruð við því að maðurinn héti í raun Sergey Cherkasov og væri rússneskur njósnari sem hefði skömmu áður reynt að verða starfsnemi hjá Alþjóðlega sakamáladómstólnum í Hag.

Áttu íbúð í blokk sem tengist rússneskri leyniþjónustu

Rússnesku hjónin svo voru handtekin í Svíþjóð í vikunni fyrir njósnir, áttu íbúð í fjölbýlishúsi í Moskvu þar sem margir starfsmenn GRU-leyniþjónustu rússneska hersins, hafa einnig átt íbúðir. Hjónin eru einnig sögð tengjast fyrrverandi yfirmanni sænskrar leyniþjónustu fjölskylduböndum.

Njósnarinn í Tromsö sagður vera ofursti í GRU

Yfirvöld í Noregi hafa nafngreint rússneskan njósnara sem handtekinn var nýverið í Tromsö. Sá heitir Mikhail Valerievich Mikushin og er fæddur árið 1978 í Rússlandi. Hann er talinn vera ofursti í GRU, leyniþjónustu rússneska hersins.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið