Vildu að öðru lög­­reglu­em­bætti yrði falin rann­­sókn Ó­s­hlíðar­­málsins

Málið var tekið upp af lögreglunni að beiðni fjölskyldu Kristins Hauks Jóhannessonar, sem lést í bílslysi í Óshlíð í september 1973, þá nítján ára gamall. Líkamsleifar Kristins voru grafnar upp af lögreglu í maí í fyrra og rannsakaðar af réttarlækni. Ættingjar Kristins telja rannsókn lögreglu á sínum tíma hafa verið ábótavant og fóru fram á að hún yrði tekin upp á ný.

Niðurstaða úr réttarkrufningu var sú að ekkert benti til annars en að Kristinn hafi látist í bílslysi. Bróðir og sonur Kristins hafa barist fyrir því um nokkurt skeið að lögregla skoða ný gögn í málinu en ekki hlotið hljómgrunn. Þórólfur Hilbert Jóhannesson, bróðir Kristins, hefur undanfarin ár verið að rannsaka málið af sjálfsdáðum og safnað nýjum gögnum, svo sem ljósmyndum, sem hann telur varpa nýju ljósi á málið. 

Vona að nýr lögreglustjóri taki málið alvarlega

Lögregla ákvað í október síðastliðnum að hætta rannsókn á málinu í ljósi niðurstöðu rannsóknar réttarlæknis. Í nóvember staðfesti Þórólfur Hilbert í samtali við fréttastofu að fjölskyldan hygðist kæra ákvörðun lögreglu til að fella niður rannsóknina. Segir meðal annars í kærunni að fjölskyldan teldi óeðlilegt að sama embættið endurskoði ítrekað fyrri athafnir sínar og var óskað eftir því að öðru lögregluembætti yrði falin rannsókn málsins. 

Þórólfur segir í samtali við fréttastofu að fjölskyldan fagni þessari ákvörðun ríkissaksóknara, sem sé með þessu að skila skömm í fang lögreglunnar á Vestfjörðum. Það hafi verið fjölskyldunni smá vonbrigði að ríkissaksóknari hafi ekki falið öðru lögregluembætti rannsóknina en hún vonist til að nýr lögreglustjóri taki málið alvarlega. 

„Í ljósi þeirra upplýsinga sem fram koma í nýjum gögnum málsins telur ríkissaksóknari ekki annað fært en að fella hina kærðu ákvörðun úr gildi og leggja fyrir lögreglustjórann á Vestfjörðum að taka afstöðu til þeirra nýju gagna sem fylgdu kæru kærenda til ríkissaksóknara og meta m.a. hvort á grundvelli þeirra gagna séu efni til að fram fari frekari rannsóknaraðgerðir í málinu,“ segir í ákvörðun ríkissaksóknara sem var kynnt fjölskyldunni á þriðjudag, 14. febrúar. 

Vísir greindi frá því 31. maí síðastliðinn að skýrslur hafi ekki verið teknar af ökumanni og farþega í bílnum fyrr en tveimur og þremur mánuðum eftir slysið. Fram kemur í lögregluskýrslum um málið, sem fréttastofa hefur undir höndum, að Kristinn hafi farið á dansleik í Hnífsdal kvöldið áður og síðan í einkasamkvæmi á Ísafirði með þremur stúlkum.

Upp úr klukkan fjögur um morguninn hafi þau farið úr samkvæminu, ásamt fjórðu stúlkunni, hitt fyrir leigubílstjóra, sem keyrði þau um Ísafjörð. Tvær stúlknanna hafi farið úr bílnum áður en haldið var til Bolungarvíkur þar sem ein stúlknanna bjó. Þegar hún hafi verið komin heim til sín hafi leigubílstjórinn haldið, með Kristinn og fjórðu stúlkuna, aftur til Ísafjarðar. Stúlkan sat í framsætinu en Kristinn Haukur lá í aftursætinu.

Rykkur hafi komið á bílinn

Höskuldur Guðmundsson, leigubílstjórinn fyrrverandi, sagði í samtali við fréttastofu 31. maí síðastliðinn að stúlkan hafi verið vinkona hans og hann hafi verið hættur að aka gegn gjaldi þetta kvöld þegar hann tók hópinn upp í bíl. Hann hafi aðeins ekið til Bolungarvíkur þar sem stúlkan sem þangað hafi þurft að komast hafi verið í vandræðum með að finna far. Kristinn Haukur hafi verið mjög drukkinn og fljótlega dáið áfengisdauða í aftursætinu.

Fram kemur í lögregluskýrslum að við blindbeygju á Óshlíðarvegi hafi komið rykkur á bílinn og Höskuldur misst stjórn á honum áður en bíllinn valt þrjátíu metra niður í flæðarmálið. Bílstjórinn sagði í skýrslutöku hjá lögreglu 23. nóvember 1973 að áður en bíllinn fór út af veginum hafi vinstra afturhjólið „neglt sig fast í bremsu“ og við það hafi hann misst stjórn á bílnum. Við rannsókn málsins var bifreiðaeftirlitsmaður fenginn til að skoða bílinn og sagði hann að stýrisliður hafi verið rofinn. Hann hafi ekkert fundið að hemlum bifreiðarinnar.

Líkið farið að stirðna þegar lögregla kom á slysstað

Höskuldur segir í samtali við fréttastofu að hann hafi ekið hægt um Óshlíðarveginn því aðstæður hafi ekki, eins og alltaf í Óshlíð, verið góðar. Þegar hann hafi ýtt lauslega á bremsuna hafi annað hjólið á bílnum læst sig og bíllinn farið út af. Hann segir það oft hafa gerst í amerískum bílum, en bíllinn var úr verksmiðju Ford 1967.

Bíllinn valt niður í flæðarmálið en lenti á hjólunum og komust bæði ökumaðurinn og stúlkan, sem hvorugt var í bílbelti, út úr bílnum af sjálfsdáðum. Þau sögðust í skýrslutöku hjá lögreglu hafa fundið vasaljós í bílnum og leitað Kristins stuttlega án árangurs. Þau hafi síðan gengið inn í Hnífsdal, um klukkustundar leið, þar sem þau gátu gert lögreglu viðvart.

Einn lögreglumaður var sendur á slysstað þar sem hann fann Kristin látinn í hlíðinni miðri, um fimmtán metra fyrir ofan staðinn þar sem bíllinn hafði stöðvast. Lögreglumaðurinn segir í skýrslu að ljóst hafi verið að Kristinn væri látinn, en storknað blóð hafi verið í munni hans og hann hafi haft mikið sár á höfði. Líkaminn hafi þar að auki verið farinn að stirðna. Læknanemi, sem hafði verið kallaður til, úrskurðaði Kristinn látinn á staðnum.