Ár flæða yfir bakka sína á vatnasviði Elliðaánna

Kristján Már Unnarsson skrifar 13. febrúar 2023 22:11

Heiðmerkurvegur í dag við Helluvatn, milli Rauðhóla og Elliðavatnsbæjarins. Egill Aðalsteinsson

Miklir vatnavextir hafa verið í dag á öllu vestanverðu landinu og ár víða flætt yfir bakka sína. Á Vestfjörðum lokaðist aðalgatan á Tálknafirði, í Borgarfirði eru vegir víða umflotnir og í Reykjavík eru flóð á vatnasviði Elliðaánna.

Í fréttum Stöðvar 2 mátti sjá myndir frá nokkrum stöðum vestanlands í dag, eins og úr Helgafellssveit á Snæfellsnesi þar sem Ragnar Axelsson ljósmyndari var á ferð.

Heimreiðin að bænum Saurum í Helgafellssveit í dag. Þar var eins og yfir hafsjó að líta og tún og girðingar í vatni.RAX

Hvassviðri með hlýnandi veðri og mikilli úrkomu varð til þess að snjór bráðnaði hratt og vatnselgurinn flæddi yfir tún og vegi.

Frá Tálknafirði fengum við myndir frá björgunarsveitunum Tálkna og Blakki. Þar var hin meinlitla Tunguá orðin að aurugu stórfljóti og flæddi yfir Strandgötu með tilheyrandi vegaskemmdum og var gatan lokuð allri umferð.

Frá Tálknafirði í dag. Tunguá flæddi yfir Strandgötu.Tálkni/Blakkur

Í Borgarfirði, sérstaklega á vatnasviði neðri hluta Hvítár, flæðir víða yfir vegi, einnig í Norðurárdal og varaði Vegagerðin við því að Norðurá gæti flætt yfir hringveginn.

Vatn flæðir yfir veg í Saurbæ í Dölum. Staðarhólskirkja og félagsheimilið Tjarnarlundur í baksýnDóróthea Sigríður

Fréttir berast raunar af vatnavöxtum af öllu vestanverðu landinu en einnig af krapaflóðum og skriðum, eins og á Gemlufalli í Dýrafirði og úr Saurbæ í Dölum, þaðan sem við fengum myndir í dag, en þar höfðu Hvolsá og Staðarhólsá breyst í ólgandi fljót.

Við Norðlingaholtshverfi í Reykjavík í dag. Þar flæðir Bugða yfir bakka sína.Egill Aðalsteinsson

Og borgarbúar fara ekki varhluta af flóðunum. Frá Suðurlandsvegi við Rauðhóla mátti sjá hvar Hólmsá og Bugða flæddu yfir yfir bakka sína. Austan við Norðlingaholtshverfi var eins og yfir hafsjó að líta og það var rétt með naumindum að Bugða kæmist undir brúna á reiðveginum.

Vegslóði austan Rauðhóla var allur á kafi. Þar breiddi Hólmsá úr sér. Egill Aðalsteinsson

Á vatnasviði Elliðaánna flæddi víða yfir vegi. Þannig var Heiðmerkurverkur undir vatni á nokkurhundruð metra kafla á móts við Helluvatn, milli Rauðhóla og Elliðavatnsbæjarins.

Það var í raun á mörkunum að vegurinn upp í Heiðmörk teldist fær en þar sagðist Gústaf Jarl Viðarsson, skógfræðingur hjá Skógræktarfélagi Reykjavíkur, vera að upplifa ótrúlega mikla vatnavexti.

Gústaf Jarl Viðarsson starfar hjá Skógræktarfélagi Reykjavíkur í Heiðmörk. Egill Aðalsteinsson

„Það er búið að flæða yfir veginn hérna. Og maður sér brúna, þar er komið mjög hátt upp.

Ég hef ekki séð þetta svona áður. Allavega þetta hefur ekki komið fyrir síðastliðin tíu ár,“ sagði Gústaf.

„Þetta er líklega vegna þess að það hafa verið svo mikil frost að vatnið nær ekki að seytla niður í gegnum jarðveginn. Þess vegna safnast þetta svona fyrir.“

Elliðaár í Víðidal neðan Breiðholtsbrautar flæddu yfir göngustíga.Egill Aðalsteinsson

Í Víðidal flæddu Elliðaár yfir göngustíga og reiðstíga og þær voru í miklum ham við Árbæjarstíflu. Ofan hennar gátu menn svo séð Árbæjarlónið birtast á ný.

Hér má sjá frétt Stöðvar 2:

Myndskeið frá Tálknafirði má sjá sér:

Veður Tálknafjörður Dalabyggð Stykkishólmur Reykjavík

Tengdar fréttir

Ekki jafn mikið rennsli í Elliðaám í mörg ár

Flóð í Elliðaám er nú í hámarki og mælist rennsli þeirra fimmtíu rúmmetrar á sekúndu. Um er að ræða mesta rennsli ána í mörg ár.

13. febrúar 2023 21:15

Krapaflóð fallið á nokkrum stöðum á vestanverðu landinu

Þá nokkur krapaflóð hafa fallið á vestanverðu landinu í dag. Í morgun féll flóð í Gemlufalli í Dýrafirði, annað flóð fyrir hádegi á Kleifaheiði og þó nokkur í Saurbæ í Dalasýslu. Þar hefur einnig ein skriða fallið.

13. febrúar 2023 17:51

„Okkar menn segja að þeir hafi ekki séð þetta áður svona mikið“

Varað hefur verið við miklum vatnavöxtum á Vesturlandi og Vegagerðin varar við slæmum akstursskilyrðum víða. Samskiptastjóri segir þetta umfangsmikið og að þeirra menn hafi ekki áður séð jafn mikla vatnavexti. Ræsi ráða ekki við vatnsflauminn og Dölunum sé allt undir.

13. febrúar 2023 15:45

Undirsláttur nýju brúarinnar farinn að skemmast

Undirsláttur nýrrar brúar yfir Stóru-Laxá er þegar farinn að skemmast vegna mikilla vatnavaxta. Rjúfa þarf veginn við ána svo stórt tjón verði ekki á brúnni.

13. febrúar 2023 19:42

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.