Héraðsdómur skar í dag úr um að Eflingu bæri að afhenda ríkissáttasemjara skrá með kennitölum allra atkvæðisbærra félagsmanna hennar.
Sólveig Anna Jónsdóttir, formaður Eflingar, hefur hins vegar sagt að Efling muni ekki afhenda félagatalið fyrr en Landréttur hefur skorið úr málinu eftir áfrýjun félagsins, sem lýst var yfir um leið og úrskurður var kveðinn upp í dag.
„Í ljósi þessarar niðurstöðu þá hlýtur að fara svo að við fáum flýtimeðferð með kæru okkar vegna þess úrskurðar sem kveðinn var upp í héraðsdómi rétt áðan um afhendingu á kjörskrá. Meðan við bíðum eftir niðurstöðu æðra dómsvalds þá afhendum við ekki kjörskrána,“ sagði hún í samtali við fréttastofu í dag.
Dómari neitaði að fresta réttaráhrifum
Efling krafðist þess í málinu að réttaráhrifum úrskurðar héraðsdóms yrði frestað þar til leyst hafi verið úr kærumáli fyrir æðri dómstól.
Í niðurstöðukafla dómsins segir að meginregla fullnusturéttarfars sé að málskot fresti ekki framkvæmd aðfarargerðar. Héraðsdómari megi þó ákveða hið gagnstæða eftir kröfu einhvers málsaðila.
„Í máli þessu er tekist á um það hvort rétt sé að bera tillögu til málamiðlunar í kjaradeilu undir atkvæði þeirra félagsmanna sem tillagan varðar. Að því virtu að með því er leitað beint til félagsmanna gerðarþola, sem gerðarþoli sækir umboð sitt frá, verður ekki séð að efni standi til að fallast á kröfu gerðarþola um frestun réttaráhrifa gerðarinnar,“ segir í dómi.
Því er ekkert því til fyrirstöðu að bein aðfarargerð verði gerð til þess að krefjast afhendingar félagaskrárinnar þá þegar.
Aðalsteinn Leifsson ríkissáttasemjari segir í samtali við fréttastofu að dómur héraðsdóms sé alveg skýr að þessu leyti, Efling verði einfaldlega að afhenda félagatal.
Kjarni málsins að meirihlutinn ráði
Aðalsteinn segist fagna niðurstöðu héraðsdóms og segir kjarna málsins vera að meirihluti félagsmanna fái að ráða í kjaradeilunni.
„Í fyrsta lagi tekur héraðsdómur af allan vafa um það að þessi miðlunartillaga er að miðlunartillagan er fullkomlega löglega fram sett. Í annan stað segir héraðsdómur hátt og skýrt að Eflingu ber að veita félagsmönnum tækifæri til að greiða atkvæði um miðlunartillöguna, sem er það sem málið snýst um,“ segir hann.
Þá segir Aðalsteinn að það hafi verið rætt ítarlega þegar lög um vinnudeilur voru sett að tilgangur þess að lögsetja atkvæði um miðlunartillögu væri að meirihluti félagsmanna fengi að ráða. Að það væri ekki lítill minnihluti félagsmanna sem tæki allar ákvarðanir í kjaradeilum.
„Ég er mjög bjartsýnn á það, í það minnsta, að félagsmenn fái tækifæri til að greiða atkvæði um það og að sjálfsögðu líka aðildarfélög Samtaka atvinnulífsins, hvort þau vilji frekar þessa lausn sem ég legg upp í miðlunartillögunni eða halda áfram á þeirri átakaleið, sem mörkuð hefur verið og við fáum þá skýra niðurstöðu með það,“ segir Aðalsteinn.
Trúir því að allir farið að lögum og reglum
Sem áður segir hefur forysta Eflingar gefið það út að félagatal verði ekki afhent þrátt fyrir úrskurð um heimild til beinnar aðfarargerðar til að fá skrána afhenta.
„Ég neita að trúa því að Efling fylgi ekki lögum og að forysta félagsins fylgi ekki dómi héraðsdóms. Það kæmi mér gríðarlega á óvart. Það eru ákveðnar leikreglur sem allir þurfa að fylgja á vinnumarkaði og ég hreinlega reikna með því að fólk muni gera það,“ segir Aðalsteinn.
Hefur boðað til fundar
Aðalsteinn segist hafa boðað Eflingu og Samtök atvinnulífsins á morgun til þess að ræða um framkvæmd atkvæðagreiðslu. Hann vonist til þess að hitta deiluaðila í fyrramálið og eftir það geti hann svarað því hvenær atkvæðagreiðsla um miðlunartillöguna fer fram.
Viðtal við Aðalstein má sjá í heild sinni í spilaranum hér að neðan:
