Febrúarspá Siggu Kling - Steingeitin

Hugsaðu bara hvað sjálf Steingeitin myndi gera í stöðunni og láttu þig vaða á næstu syllu ef þú þarft. Síðustu tveir mánuður hafa sett nýjan status í líf þitt, þú kemur meira að segja sjálfri þér á óvart hversu röggsöm þú ert.

Febrúar og mars koma með úkomuna af síðustu 60 dögum og þá veistu hversu heppin þú ert. Sjálfsöryggi og sjálfstraust eru einkunnarorð þín og gefðu engan afslátt, því þú þarft þess ekki. Það er svo merkilegt að þú færð meira upp í hendurnar en flest önnur merki, þú þarft bara að segja hvað þú vilt og að tala við þá aðila sem geta afhent þér það sem þig vantar. Gerðu eitthvað þrennt í næsta mánuði sem þér hefur aldrei dottið í hug að gera áður. Þú þarft áskoranir, því þú þrífst svo illa á því að horfa til dæmis á sjónvarp og að eyða tímanum þannig sem þú svo sannarlega átt.

Ástin ætti að blómstra því að þú ert undir hennar töfrum. Oft er maður ekki nógu ánægður með það sem maður hefur, en grasið er ekki grænna hinum megin við húsið. Svo ræktaðu garðinn þinn, sáðu nýjum blómum og láttu hugmyndaflugið flæða, því að lífið ætlar að leika við þig.

Þú fellur aldrei það langt niður í hjarta þínu og huga að þú sjáir ekki ástæður til þess að standa upp strax. Það er alveg sama á hvaða aldri þú ert þá hefurðu svo mikið samskiptavit og kannt að blessa barnið sem í þér býr. Þessi tími sem þú ert að ganga inn gefur huga þínum mikla forvitni sem fær þig svo sannarlega til þess að líta út fyrir þægindarammann og að sjá að þú hefur bæði pláss og tíma fyrir nýja lífsreynslu.

Knús og kossar, Sigga Kling