Það kemur nefnilega fyrir að þú ert á undan sálinni þinni og þá finnurðu ekki það jafnvægi sem þú þarft til þess að fljúga. Allt kemur léttilega til þín um leið og þú finnur að þú ert að róast og hefur þá trú að febrúar mánuður færi þér réttu verkfærin. Þó að þú hættir við að gera það sem þú ert að gera þessa stundina, þá heitir það ekki að gefast upp. ‚Þð heitir einfaldlega að taka ákvörðun um lífið þitt og að þú ert forstjórinn yfir sjálfum þér.

Ekki gefa þér of miklar áskoranir eins og til dæmis að vera í líkamsrækt eða vera í þessu eða hinu, heldur áttu að sjá að þessi tími, sem sagt háveturinn, er til þess að slaka vel á ef þú mögulega getur.

Þú ferð í ferðalag sem gefur þér mikla andargift og betri hugsun, því þú ert alls ekki manneskja sem þolir að vera í sama hjólfarinu dag eftir dag. Skapaðu þér eins mikið og þú getur núna, það er mikið sjálfstæði og trú á þessa merkilegu persónu og sál sem í þér býr.

Þú ert það sem þú hugsar allan daginn og það sem þú segir skapar þinn eigin raunveruleika. Núna eru áhrif tunglanna þér svo jákvæð, þú magnast upp og lætur hið veraldlega ekki skipta þig eins miklu máli. Það bjargast allt sem þú ert að berjast við, svo óttastu eigi því það er verið að hugsa vel um þig.

Það eru svo margir í kringum þig sem vænta of mikils af þér, en það eru þeirra væntingar og ekki þínar. Þetta verður þitt besta ár þegar þú getur hætt að spá í hvað aðrir eru að hugsa. Hið fulla tungl í Ljóninu þann fimmta febrúar hefur mikil áhrif á þig og á þeim tíma endurskoðarðu svo margt og setur nýja leiðarvísi fyrir sjálfan þig inn. Undir lok febrúar mánaðar er svo margt búið að gerast sem hjálpar þér að réttri staðsetningu og hamingju.

Knús og kossar, Sigga Kling