Viðskipti innlent

„Merki­legt ef við ætlum að skjóta skjóls­húsi yfir skatta­flótta­fólk frá Noregi“

Berghildur Erla Bernharðsdóttir skrifar
Jón Kaldal talsmaður íslenska náttúruverndarsjóðsins segir hugmyndir SFS um möguleika til framleiðsluaukningar á eldisfiski í sjó fjarstæðukenndar. Heiðrún Lind Marteinsdóttir framkvæmdastjóri samtakanna segir mögulegt að margfalda framleiðslu á eldisfiski í sjó.
Jón Kaldal talsmaður íslenska náttúruverndarsjóðsins segir hugmyndir SFS um möguleika til framleiðsluaukningar á eldisfiski í sjó fjarstæðukenndar. Heiðrún Lind Marteinsdóttir framkvæmdastjóri samtakanna segir mögulegt að margfalda framleiðslu á eldisfiski í sjó. Vísir

Talsmaður íslenska náttúruverndarsjóðsins telur hugmyndir SFS um að margfalda sjókvíaeldi villandi, umhverfisáhrifin af því séu ekki verjanleg. Norsk fiskeldisfyrirtæki flýi hingað því skattaumhverfið sé hagstæðara en í Noregi og taki svo hagnaðinn aftur heim.

Framkvæmdastjóri Samtaka fyrirtækja í sjávarútvegi sagði í fréttum okkar í gær raunhæft að áætla að á næstu áratugum verði hægt að framleiða níu sinnum meira af eldisfiski í sjó hér á landi en nú er. Með landeldi væri hægt að tólffalda framleiðsluna. Þetta væri niðurstaða samtakanna eftir skýrslu frá ráðgjafafyrirtækinu McKinsey. Þá fagnaði hún fjárfestingu Norðmanna í fiskeldi hér á landi.

Jón Kaldal talsmaður íslenska náttúruverndarsjóðsins sem talar fyrir verndun íslenska laxastofnsins segir þessar hugmyndir fjarstæðukenndar.

„Ég tel engar líkur á að þetta raungerist. Þetta er frekar eitthvað sem verið er að villa um fyrir almenningi og mögulega stjórnvöldum. Innanbúðarmenn í sjókvíaeldisfyrirtækjunum hafa sjálfir margir hverjir lagt fram það raunhæfa mat að sjókvíaeldi í núverandi mynd í netpokum muni heyra sögunni til kringum árið 2030. Einfaldlega vegna þess að umhverfisáhrifin eru ekki verjanleg,“ segir Jón.

Hann segir þessar tölur líka fjarri mati Hafrannsóknarstofnunar. 

„Það liggur fyrir af hálfu Hafrannsóknarstofnunar áhættumat um erfðablöndun sem á að vera til varnar villtum laxi. Þar kemur fram að hámarks framleiðsla hér geti verið 106 þúsund tonn á ári,“ segir hann.

Jón segir að endurskoða eigi áhættumatið á þessu ári og telur að þar verði einnig tekið tillit til sleppingarslysa úr sjókvíaeldi.

„Til að setja þetta í samhengi þá sluppu úr einni sjókví í Arnarfirði 88 þúsund eldislaxar. Allur villti stofninn er í kringum 60 þúsund fiskar. Þetta er þegar farið að skaða íslenskt lífríki verulega,“ segir hann. 

Skattaparadísin Ísland

SFS telur að verði framleiðsluaukning að veruleika muni mögulegt útflutningsverðmæti hljóða upp á 450 milljarða íslenskra króna. Jón efast um þessar tölur. Norðmenn eigi langstærstan hluta íslenskra sjókvíaeldisfyrirtækja.

„Norðmenn eiga held ég tæplega níutíu prósent af íslensku sjókvíeldisfyrirtækjunum. Peningarnir í þessari starfsemi hér koma frá erlendu móðurfélögunum og arðurinn fer þangað líka. Norðmenn eru núna að flýja Noreg því auðlindaskatturinn þar fer í 40 prósent. Fulltrúar stærstu sjókvíaeldisfyrirtækja heims frá Noregi eins og Mowis og Salmar hafa talað um að skattumhverfi í Noregi sé að verða þeim óhagstætt og þeir líti hýru auga til vaxtar á Íslandi og Skotlandi. Það er merkilegt ef við ætlum að skjóta skjólshúsi yfir skattaflóttafólk frá Noregi vegna þess að Íslendingar hafa ekki haft vit á því að rukka nóg fyrir afnot af sameiginlegum auðlindum þjóðarinnar,“ segir Jón að lokum.


Tengdar fréttir

Norska skatta­flótta­fólkið og fyrir­heitna landið Ís­land

Ísland er nú orðið fyrirheitna landið í augum ríkasta fólks Noregs sem hefur á undanförnum mánuðum flúið land í stórum stíl. Eða réttara sagt fyrirtækjarekstur á Íslandi er það sem heillar því þetta fólk ætlar ekki að borga skatt hér, frekar en í heimalandi sínu.

SFS vilja margfalda fiskeldi og fagna erlendri fjárfestingu

Framkvæmdastjóri Samtaka fyrirtækja í sjávarútvegi telur raunhæft að á næstu áratugum verði hægt að framleiða tólf sinnum meira af eldisfiski hér á landi en nú er. Hún fagnar aukinni fjárfestingu Norðmanna í fiskeldi hér á landi. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.