Viðskipti innlent

Mýflug kaupir þriðjung í Erni og Hörður selur meirihlutann

Kristján Már Unnarsson skrifar
Hörður Guðmundsson, forstjóri Flugfélagsins Ernis.
Hörður Guðmundsson, forstjóri Flugfélagsins Ernis. Sigurjón Ólason

Eftir meira en hálfrar aldar rekstur hefur Hörður Guðmundsson selt meirihluta sinn í Flugfélaginu Erni og er Mýflug í Mývatnssveit orðinn þriðjungseigandi. Hörður segir að með þessu sé ætlunin að styrkja rekstur tveggja lítilla flugfélaga.

Gengið var frá kaupunum milli jóla og nýárs og eiga Hörður Guðmundsson og fjölskylda núna þriðjung í félaginu. Í fréttum Stöðvar 2 var rætt við Hörð á Reykjavíkurflugvelli í dag.

„Allt hefur sinn tíma. Við erum búin að vera að huga að þessu um nokkurn tíma. Þetta hefur verið fjölskyldufyrirtæki og verður kannski að einhverju leyti áfram,“ segir Hörður.

Nítján sæta skrúfuþotur af gerðinni Jetstream eru aðalflugkostur félagsins í áætlunarflugi þess til fjögurra staða innanlands. Ernir sinnir einnig leiguflugi og sjúkraflugi til útlanda.Sigurjón Ólason

Eftir breytinguna á Mýflug þriðjung í Erni og aðrir fjárfestar þriðjung en Hörður segir að engin umskipti verði í rekstri félaganna.

„Það er ekki verið að fara út í neina ævintýramennsku. Það er bara verið að styrkja tvö lítil flugfélög og gera þau aðeins sterkari heldur en þau kannski hafa verið. En framtíðin er nokkuð björt.“

Hörður segir að aukin hagkvæmni eigi að nást, eins og í rekstri og markaðsstarfi, en ekki sé stefnt að samruna félaganna.

Mýflug er einkum í sjúkraflugi innanlands en sinnir einnig leiguflugi.Skjáskot/Stöð 2

„Nei. Mýflug er bara, eins og Ernir, lítið en öflugt félag. Við náum þarna ákveðnum samlegðaráhrifum sem er hollt fyrir bæði félögin. Þessi félög verða rekin áfram, allavega fyrst um sinn, sem bara tvö sjálfstæð félög,“ segir Hörður.

Ernir er, miðað við kennitölu, elsta starfandi flugfélag landsins. Hörður stofnaði það á Ísafirði árið 1970, var sjálfur byrjaður að fljúga árið áður, og hann verður áfram forstjóri.

Hörður Guðmundsson ræðir við fréttamann Stöðvar 2 í flugskýli félagsins á Reykjavíkurflugvelli í dag.Sigurjón Ólason

-En ert þú sjálfur að setjast í helgan stein?

„Nei, nei. Hvað? Það er engin ástæða til þess. Enn ungur maður og fullur starfsorku.“

-Þannig að þú verður áfram forstjóri Ernis?

„Ja, kannski til að byrja með. Svo sjáum við bara til,“ svarar Hörður Guðmundsson, forstjóri Flugfélagsins Ernis.

Hér má sjá frétt Stöðvar 2

Fréttir af flugi Reykjavíkurflugvöllur Ísafjarðarbær Þingeyjarsveit Kaup og sala fyrirtækja

Tengdar fréttir

Hefja á­ætlunar­flug til Vest­manna­eyja á ný

Flugfélagið Ernir hefur gert samkomulag við innviðaráðuneytið um flug til Vestmannaeyja þrisvar sinnum í viku, tvö flug á þriðjudögum og eitt á föstudögum. Ekki hefur verið áætlunarflug milli lands og Eyja frá því að það lagðist af haustið 2020.

Grænlenskir foreldrar leigðu flugvél frá Íslandi svo börnin kæmust á fótboltamót

Foreldrar ellefu fótboltakrakka í bænum Qaqortoq á Suður-Grænlandi dóu ekki ráðalausir þegar flugfélagið Air Greenland tilkynnti þeim að ekki væru nógu mörg sæti til að flytja allan hópinn til Tasiilaq á Austur-Grænlandi. Þeir tóku sig saman og leigðu flugvél frá Íslandi. Kostnaðurinn við flugið: 600 þúsund krónur á hvert barn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið