Kjósa nýjan lögmann Færeyja í fyrramálið

Kristján Már Unnarsson skrifar 21. desember 2022 22:41

Aksel V. Johannesen, formaður Jafnaðarflokksins, í viðtali við Kringvarp Færeyja. Kringvarpið

Samkomulag hefur náðst um myndun nýrrar landsstjórnar í Færeyjum undir forystu Aksels V. Johannesen, formanns Jafnaðarflokksins, sem verður á ný lögmaður Færeyja, en því embætti gegndi hann einnig á árunum 2015 til 2019.

Í fréttum Stöðvar 2 kom fram að Aksel V. Johannesen náði samkomulagi í gærkvöldi við þau Høgna Hoydal, formann Þjóðveldis, og Ruth Vang, formann Framsóknar, um myndun nýrrar mið- og vinstristjórnar.

Høgni Hoydal, formaður Þjóðveldis, og Ruth Vang, formaður Framsóknar.Kringvarpið

Samkvæmt frétt Kringvarps Færeyja er búist við að Jafnaðarflokkurinn fái annaðhvort þrjá eða fjóra ráðherra, Þjóðveldið þrjá og Framsókn tvo, þar á meðal embætti fjármálaráðherra.

Hús Lögþings Færeyja í Þórshöfn.Lögþingið

Stefnt er að því að því að samstarfssáttmáli flokkanna verði kynntur á fréttamannafundi í Þórshöfn klukkan 8:45 í fyrramálið. Þingfundur á Lögþinginu hefur svo verið boðaður klukkan 10 þar sem kjósa á formann Lögþingsins og síðan nýjan lögmann Færeyja.

Hér má sjá frétt Stöðvar 2:

Færeyjar

Tengdar fréttir

Samkomulag um nýja stjórn í Færeyjum

Aksel V. Johannesen, formaður Jafnaðarflokksins í Færeyjum, segir að samkomulag hafi náðst um myndun nýrrar mið- og vinstristjórnar Jafnaðarflokksins, Þjóðveldis og Framsóknar.

21. desember 2022 09:53

Viðræðum slitið um myndun nýrrar stjórnar í Færeyjum

Jafnaðarflokkurinn, Sambandsflokkurinn og Framsókn slitu í kvöld viðræðum um myndun nýrrar landsstjórnar í Færeyjum. Ágreiningur um ríkisstuðning frá Danmörku reyndist of stór biti til að kyngja, segir í frétt Kringvarps Færeyja.

13. desember 2022 21:55

Jafnaðarflokkurinn vann sigur í Færeyjum

Jafnaðarflokkur Færeyja er sigurvegari í þingkosningunum sem fram fóru þar í landi í gær. Flokkurinn náði níu þingsætum sem er bæting um tvö frá fyrra þingi og er þar með orðinn stærsti flokkur Færeyja eftir að hafa fengið 26,6 prósent atkvæða.

9. desember 2022 07:24

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.