Fjörutíu stig Antetokounmpos dugðu ekki gegn Lakers

Los Angeles Lakers gerði góða ferð til Milwaukee þar sem þeir náðu í sigur gegn liði Bucks. Stórleikur Giannis Antetokounmpo, sem skoraði 40 stig í leiknum, dugði ekki til því Anthony Davis gerði enn betur og skoraði 44 stig í 133-129 sigri Lakers liðsins.

Í leiknum komst LeBron James uppfyrir Magic Johnson á lista yfir stoðsendingahæstu menn frá upphafi í NBA-deildinni. Hann er nú í sjötta sæti listans og áfanganum náði hann í fjórða leikhluta þegar hann gaf sendingu á Davis sem skoraði með þriggja stiga skoti.

„Þetta er þýðingamikið, augljóslega. Það var mjög smitandi að fylgjast með Magic og hvernig hann nálgaðist leikinn. Liðsfélagar hans elskuðu að spila með honum því leikgleðin var svo mikil sem og hæfileikinn til að gefa boltann og fá aðra með í leikinn. Hann var alltaf spenntur að sjá liðsfélaga sína vera frábæra. Ég hef alltaf dáðst að þessu hjá honum,“ sagði LeBron eftir leikinn í nótt.

James skoraði 28 stig í leiknum í nótt og vantar núna aðeins 936 stig til að komast upp fyrir Kareem-Abdul Jabbar og verða stigahæsti leikmaður sögunnar í NBA.

Önnur úrslit í NBA-deildinni í nótt:

Charlotte Hornets - Washington Wizards 117-116

Atlanta Hawks - Denver Nuggets 117-109

Boston Celtics - Miami Heat 116-120

Brooklyn Nets - Toronto Raptors 114-105

Cleveland Cavaliers - Orlando Magic 107-96

Memphis Grizzlies - Philadelphia 76´ers 117-109

San Antonio Spurs - New Orleans Pelicans 99-117

Phoenix Suns - Houston Rockets 121-122

Utah Jazz - Indiana Pacers 139-119

Golden State Warriors - Chicago Bulls 119-111