Lífið

Sjarmatröllið sem vann hug og hjarta þjóðarinnar fyrir ní­tján árum síðan

Elma Rut Valtýsdóttir skrifar
Anna Katrín Guðbrandsdóttir lenti í 3. sæti í fyrsti þáttaröð af Idol Stjörnuleit.
Anna Katrín Guðbrandsdóttir lenti í 3. sæti í fyrsti þáttaröð af Idol Stjörnuleit.

Það muna eflaust margir eftir hinni sautján ára gömlu Önnu Katrínu sem mætti í áheyrnarprufur fyrir Idol Stjörnuleit fyrir tæpum tveimur áratugum síðan. Anna Katrín vann hug og hjörtu þjóðarinnar og var meðal annars kölluð „sjarmatröll“ og „sviðsdýr“.

„Ég held ég sé góð fyrirmynd og mér finnst þetta rosalega skemmtilegt og ég held ég muni standa mig mjög vel í þessu,“ sagði Anna Katrín Guðbrandsdóttir, þegar hún mætti í sínar fyrstu áheyrnarprufur á Hótel Kea á Akureyri árið 2003.

Nokkrum mánuðum áður hafði Anna Katrín sigrað Söngvakeppni framhaldsskólanna með laginu Vísur Vatnsenda-Rósu og var hún því nokkuð sviðsvön. Hún sagði það þó vera mun meira stressandi að standa ein fyrir framan þrjá dómara og syngja, heldur en uppi á sviði fyrir framan fullan sal af fólki.

„Ég syng á hverjum degi. Ég syng nú oftast bara í herberginu mínu og ég hef alltaf fengið mjög góða krítík fyrir það hvernig ég syng,“ sagði hún sjálfsörugg áður en hún fór inn til dómaranna, Siggu Beinteins, Bubba Morthens og Þorvalds Bjarna, og flutti Maístjörnuna.

Klippa: Anna Katrín - Fyrsta þáttaröð Idol

Röddin heillaði en lykkjurnar ekki

Dómararnir heilluðust af Önnu Katrínu og hennar undurfögru rödd, en voru þó síður hrifnir af lykkjum og slaufum sem þeim fannst hún nota heldur of mikið. 

„Mér fannst svolítið ljótt hvað þú notaðir alltaf sömu lykkjuna fyrir aftan hverja nótu. Þú hefur náð tökum á þeirri lykkju en ég veit ekki hvað þú getur meira af því þú söngst alltaf sömu,“ sagði Þorvaldur Bjarni sem vildi þó sjá meira af Önnu Katrínu.

„Ég ætla að segja já vegna þess að þú heillaðir mig alveg. Þú hefur mikla útgeislun. Þú syngur vel en það má minnka lykkjurnar og nota þær á færri stöðum. Það má ekki ofnota svona skraut. Það er kraftur í þér og ég vil sjá þig áfram,“ sagði Sigga Beinteins.

Vann hug og hjörtu þjóðarinnar

„Ég veit að þetta er svalt og þetta er inn, þessi söngstíll, en þetta lag þurfti ekkert á þessu að halda, ekki baun í bala,“ sagði Bubbi Morthens sem var ekki þekktur fyrir það að skafa af hlutunum í dómarahlutverkinu. Þá minnti hann hana á það að hún hafi verið að syngja á íslensku og ætti því að vanda framburðinn.

Þrátt fyrir þessa gagnrýni fékk Anna Katrín þrjú já og komst því áfram. Hún óx og dafnaði með hverjum þættinum. Með tímanum tókst henni svo að vinna hug og hjörtu bæði dómnefndar og þjóðarinnar.

Klippa: Anna Katrín - Ekkert breytir því

„Þú bara hefur þetta“

„Þú ert með svona tónlistarhæfileika sem eru þannig að maður treystir þér bara þegar þú byrjar. Það er allt í lagi þó að þú myndir fara aðeins út fyrir, því þú bara hefur þetta. Ég hef trú á því að þú eigir eftir að vinna þetta,“ sagði Þorvaldur Bjarni við Önnu Katrínu eftir flutning hennar í níu manna úrslitunum í Vetrargarðinum.

„Ef þú vinnur ekki þessa keppni verður þú samt poppstjarna,“ bætti Sigga Beinteins við.

Sjarmatröllið Anna Katrín komst alla leið í úrslitaþáttinn þar sem hún stóð ein eftir með þeim Kalla Bjarna og Jóni Sigurðssyni. Það var Kalli Bjarni sem stóð uppi sem fyrsta Idolstjarna Íslands og hafnaði Anna Katrín í þriðja sæti sem verður að teljast stórkostlegur árangur.

Anna Katrín hefur búið í Danmörku undanfarin áratug. Samkvæmt Facebook-síðu hennar starfar hún í dag sem verkefnastjóri hjá Rauða krossinum þar í landi.

Í tilefni þess að fimmta þáttaröð af Idol er nú í fullum gangi mun Vísir rifja upp gömul Idol augnablik sem fara með lesendur aftur til fortíðar og kalla fram sannkallaða nostalgíu.


Idol verður á Stöð 2 á föstudagskvöldum í vetur. Fleiri hundruð söngvarar spreyttu sig í áheyrnaprufunum en að lokum mun einn standa uppi sem sigurvegari. Fyrsti þáttur fór í loftið föstudagskvöldið 25. nóvember. 


Tengdar fréttir

1 dagur í Idol: Eftir­minni­legir kepp­endur úr fyrstu þátta­röð

Idol Stjörnuleit var haldin í fyrsta sinn hér á landi árið 2003. Þá hafði þátturinn farið sigurför um heiminn og áhuginn hér á landi því gríðarlegur. Um 1400 mans skráðu sig í áheyrnarprufur og freistuðu þess að verða fyrsta Idolstjarna Íslands.

5 dagar í Idol: Svíður enn að hafa til­kynnt rangan keppanda

Þau eru ansi stór fótsporin sem þau Aron Mola og Sigrún Ósk þurfa að feta í í nýrri þáttaröð Idol sem hefur göngu sína á föstudaginn. Kynnarnir Simmi og Jói settu mikinn svip á fyrri þáttaraðir, svo mikinn að þeir voru notaðir sem fordæmi fyrir Idol kynna í öðrum löndum.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.